Vazhivilakk

ഇന്ത്യയില്‍ ഇസ്‌ലാമിന്റെ പ്രചാരണം സാധ്യമാക്കിയത്

ഇന്ത്യയിൽ ഇസ്‌ലാമിന്റെ പ്രചാരണം സാധ്യമാക്കിയത് അതിൻറെ സാഹോദര്യ സങ്കല്പമാണ്. ജാതി വ്യവസ്ഥ സൃഷ്ടിച്ച കടുത്ത സാമൂഹ്യ ഉച്ചനീചത്വവും അസമത്വവും വേട്ടയാടിക്കൊണ്ടിരുന്ന അധസ്ഥിത സമൂഹമാണ് കൂടുതലായും ഇസ്ലാമിൽ ആകൃഷ്ടനായത്.

ദാഹിറിൻറെ കൊട്ടാരത്തിലേക്ക് താഴ്ന്ന ജാതിക്കാർക്ക് ദൂരെനിന്ന് നോക്കാൻ പോലും അനുവാദമുണ്ടായിരുന്നില്ല. എന്നാൽ അതേ കൊട്ടാരം മുഹമ്മദ് ബ്നു കാസിമിൻറെ അധീനതയിലാപ്പോൾ അദ്ദേഹം അവിടെ ഒരു വിരുന്നൊരുക്കി. അതിൽ അയിത്തജാതിക്കാരു ൾപ്പെടെ എല്ലാവരും ഒരുമിച്ചിരുന്ന് ഭക്ഷണം കഴിച്ചു. ഇത്തരം സമീപനങ്ങൾ ഞങ്ങൾ ഇന്ത്യൻ സമൂഹത്തിലുണ്ടാക്കിയ പ്രതികരണം വളരെ വലുതായിരുന്നു. അടിമ സമാനമായ ജീവിതം നയിച്ചിരുന്ന കീഴാള ജാതിക്കാർ ഇസ്‌ലാം സ്വീകരിക്കാൻ ഇത് കാരണമായി.

കടുത്ത ഇസ്‌ലാം വിരോധിയായ ഹാവൽ നിരീക്ഷിക്കുന്നു:” ഇസ്‌ലാമിൻറെ തത്വചിന്തയല്ല, സാമൂഹികവീക്ഷണമാണ് ഇന്ത്യയിൽ നിന്ന് ഒട്ടേറെ അനുയായികളെ അതിന് നേടിക്കൊടുത്തത്… ഇസ്‌ലാം സ്വീകരിച്ചവർക്ക് അതേത്തുടർന്ന് ഖുർആൻ അനുശാസിക്കുന്ന നിയമ സംഹിതകളുടെ സർവ്വ പരിരക്ഷയും ലഭിച്ചു. അങ്ങനെയല്ലാത്തവരാകട്ടെ കൂടുതൽ പ്രാകൃതമായ ആര്യൻ നിയമസംഹിതകളുടെ കീഴിലായിരുന്നു. ഈ ഒരൊറ്റ കാരണം കൊണ്ട് തന്നെകീഴാള വിഭാഗത്തിൽ നിന്ന് ഇസ്‌ലാമിലേക്ക് മതം മാറാനുള്ള പ്രേരണ വർധിച്ചു.”(E.B.Havel: The history of Aryan rule in India from the earliest times to the death of Akbar)

Also read: ചോര തന്നെ കൊതുകിന്നു കൗതുകം

മുസ്‌ലിംകളോട് കഠിന ശത്രുത പുലർത്തിയിരുന്ന ഡബ്ലിയു. ഡബ്ലിയു ഹണ്ടർ പറയുന്നു:”ഗംഗയുടെ തീരത്ത് താമസിച്ചിരുന്ന പൂർവിക സമുദായങ്ങളെ തങ്ങളുമായി കൂടിക്കലരാൻ ജാതി ഹിന്ദുക്കൾ അനുവദിച്ചിരുന്നില്ല. എന്നാൽ മുസ്‌ലിംകളാകട്ടെ, ബ്രാഹ്മണർക്കും അധഃകൃത വർഗ്ഗക്കാർക്കും ഒരുപോലെ മനുഷ്യാവകാശങ്ങൾ നൽകി. അവരിലെ പ്രബോധകർ എല്ലായിടത്തും പ്രഖ്യാപിച്ചത് ഇപ്രകാരമാണ്:’എല്ലാവരും ഉന്നതനും ഏകനുമായ അല്ലാഹുവിന് വണങ്ങണം. എല്ലാ മനുഷ്യരും അവൻറെ അടുക്കൽ തുല്യരാണ്. ഭക്തി കൊണ്ടല്ലാതെ മറ്റൊന്നു കൊണ്ടും ആർക്കും ആരെക്കാളും ഒരു ശ്രേഷ്ഠതയുമില്ല. അല്ലാഹു അവരെല്ലാം മണൽത്തരികൾ പോലെയാണ് സൃഷ്ടിച്ചത്.”(Our Indian Muslims)

പണ്ഡിറ്റ് ജവഹർലാൽ നെഹ്റു എഴുതുന്നു:”ഇസ്‌ലാമിൻറെ ആഗമനത്തിനും വടക്കുപടിഞ്ഞാറൻ അതിർത്തി വഴി വന്ന മുസ്‌ലിം യോദ്ധാക്കളുടെ കടന്നുവരവിനും ഇന്ത്യയുടെ ചരിത്രത്തിൽ വലിയ പ്രാധാന്യമുണ്ട്. ഹിന്ദു സമുദായത്തിൽ പ്രചരിച്ചു കഴിഞ്ഞിരുന്ന ജാതീയമായ വേർതിരിവ്, അയിത്താചരണം തുടങ്ങിയ ദൂഷ്യങ്ങളെയും ലോകത്തുനിന്ന് ഒറ്റപ്പെട്ട കഴിയാനുള്ള പ്രവണതയെയും അത് പുറത്തു കൊണ്ടുവന്നു. മുസ്‌ലിംകൾ വിശ്വസിക്കുകയും ആചരിക്കുകയും ചെയ്തിരുന്ന സമത്വവും സാഹോദര്യവും ഹിന്ദുക്കളുടെ ഹൃദയങ്ങളിൽ ശക്തമായ പ്രതികരണം സൃഷ്ടിച്ചു. ഹിന്ദു സമുദായം സമത്വം മനുഷ്യാവകാശവും നിഷേധിച്ചിരുന്ന പാവങ്ങളിലായിരുന്നു ഈ പ്രതികരണം ഏറ്റവുമധികം ചലനങ്ങൾ സൃഷ്ടിച്ചത്.”

(ഉദ്ധരണം: ഇന്ത്യയുടെ സാമൂഹിക രൂപീകരണവും മുസ്‌ലിംകളും. പുറം:47-51)

Facebook Comments

ശൈഖ് മുഹമ്മദ് കാരകുന്ന്

കേരളത്തിൻറെ സാഹിത്യ, സാമൂഹ്യ, സാംസ്കാരിക മണ്ഡലങ്ങളിൽ നിറഞ്ഞുനിൽക്കുന്ന വ്യക്തിത്വത്തിൻറെ ഉടമയാണ് ശൈഖ് മുഹമ്മദ് കാരകുന്ന്. പരിശുദ്ധ ഖുർആൻ പരിഭാഷയും 13 വിവർത്തന കൃതികളും ഉൾപ്പെടെ 84 ഗ്രന്ഥങ്ങളുടെ കർത്താവാണ്. പരിഭാഷക്കും രാഷ്ട്രാന്തരീയ പാരസ്പര്യത്തിനുമുള്ള 2019ലെ ഖത്തർ ശൈഖ് ഹമദ് അന്താരാഷ്ട്ര അവാർഡ് ജേതാവാണ്. സാമൂഹ്യ പ്രവർത്തനത്തിനുള്ള കെ. കരുണാകരൻ അവാർഡ് നേടിയ ശൈഖ് മുഹമ്മദിൻറെ അഞ്ച് ഗ്രന്ഥങ്ങൾക്ക് അവാർഡുകൾ ലഭിച്ചിട്ടുണ്ട്. അഞ്ച് ഗ്രന്ഥങ്ങൾ ഇംഗ്ലീഷിലേക്കും പത്തെണ്ണം കന്നഡയിലേക്കും മൂന്നെണ്ണം തമിഴിലേക്കും ഒന്ന് മറാഠിയിലേക്കും വിവർത്തനം ചെയ്യപ്പെട്ടിട്ടുണ്ട്. കൂടാതെ നൂറുക്കണക്ക് ലേഖനങ്ങൾ ആനുകാലികങ്ങളിൽ പ്രസിദ്ധീകരിക്കപ്പെട്ടിട്ടുണ്ട്. 33 വർഷം ഐ. പി. എച്ച്. ഡയറക്ടറും ദീർഘകാലം പ്രബോധനം വാരിക ചീഫ് എഡിറ്ററുമായിരുന്ന ശൈഖ് മുഹമ്മദ് ഇപ്പോൾ ഡയലോഗ് സെൻറർ കേരളയുടെ ഡയറക്ടറും കേരള മുസ്ലിം ഹെറിറ്റേജ് ഫൗണ്ടേഷൻ ചെയർമാനും നിരവധി മത, സാമൂഹ്യ,സാംസ്കാരിക സംവിധാനങ്ങളുടെ ഭാരവാഹിയുമാണ്. ദോഹ ഇന്റർ നാഷണൽ കോൺഫറൻസ്, ദുബായ് ഇൻറർനാഷണൽ ഖുർആൻ കോൺഫ്രൻസ്, ഐ. ഐ. എഫ്. എസ്.ഒ. ഏഷ്യൻ റീജണൽ ക്യാമ്പ് തുടങ്ങിയവയിൽ സംബന്ധിച്ചിട്ടുണ്ട്. മതാന്തര സംവാദ വേദികളിലും സാംസ്കാരിക പരിപാടികളിലും സജീവ സാന്നിധ്യമായ ശൈഖ് മുഹമ്മദ് കാരകുന്ന് അറിയപ്പെടുന്ന പ്രഭാഷകനുമാണ്. 1950 ജൂലൈ 15 മഞ്ചേരിക്കടുത്ത കാരകുന്നിലെ പുലത്ത് ഗ്രാമത്തില്‍ ജനിച്ചു. പിതാവ് പുലത്ത് മുഹമ്മദ് ഹാജി . മാതാവ് ആമിന. പുലത്ത് ഗവണ്‍മെന്റ് ലോവര്‍ പ്രൈമറി സ്‌കൂള്‍, കാരകുന്ന് അപ്പര്‍ പ്രൈമറി സ്‌കൂള്‍, മഞ്ചേരി ഗവണ്‍മെന്റ് ഹൈസ്‌കൂള്‍, ഫറോക്ക് റൗദത്തുല്‍ ഉലൂം അറബിക് കോളേജ്, കോഴിക്കോട് എല്‍.ടി.ടി. സെന്റര്‍ എന്നിവിടങ്ങളില്‍ വിദ്യാഭ്യാസം. മൊറയൂര്‍ വി.എച്ച്.എം.ഹൈസ്‌കൂള്‍, എടവണ്ണ ഇസ്ലാഹിയാ ഓറിയന്റല്‍ ഹൈസ്‌കൂള്‍ എന്നിവിടങ്ങളില്‍ അദ്ധ്യാപകനായി ജോലി ചെയ്തു. ഇപ്പോള്‍ ജമാഅത്തെ ഇസ്ലാമി കേന്ദ്ര പ്രതിനിധി സഭാംഗം, കേരള സംസ്ഥാന കൂടിയാലോചനാ സമിതി അംഗം ,എന്നീ ചുമതലകള്‍ക്കൊപ്പം സംസ്ഥാന സെക്രട്ടറി കൂടിയാണ്.സുഊദി അറേബ്യ , യു.എ.ഇ ,ഒമാന്‍ , കുവൈത്ത്, ഖത്തര്‍ , ബഹ്‌റൈന്‍ , സിംഗപ്പൂര്‍, ശ്രീലങ്ക, മലേഷ്യ എന്നീ നാളുകള്‍ സന്ദര്‍ശിച്ചു. ആമിന ഉമ്മു അയ്മനാണ് കുടുംബിനി. അനീസ് മുഹമ്മദ് , ഡോക്ടര്‍ അലീഫ് മുഹമ്മദ് , ഡോക്ടര്‍ ബാസിമ , അയമന്‍ മുഹമ്മദ് എന്നിവര്‍ മക്കളും ഡോക്ടര്‍ അബ്ദുറഹമാന്‍ ദാനി, ഷമിയ്യത് , ആയിഷ നസീബ, ഇബ്തിസാം എന്നിവര്‍ ജാമാതാക്കളുമാണ്.

Related Articles

Back to top button

Adblock Detected

Please consider supporting us by disabling your ad blocker