Vazhivilakk

നീഗ്രോകൾക്കിവിടെ ഭക്ഷണമില്ല

ഇസ്ലാം സ്വീകരിച്ച് മുഹമ്മദലി ആകുന്നതിനു മുമ്പ് ‘ഇടിക്കൂട്ടിലെ പൂമ്പാറ്റ’എന്ന അപരനാമത്തിൽ അറിയപ്പെടുന്ന എക്കാലത്തെയും ബോക്സിങ് ലോകത്തെ ഇതിഹാസമായ കാഷ്യസ് ക്ലേ തൻറെ ആത്മകഥയായ “പൂമ്പാറ്റയുടെ ആത്മാവിൽ” തിക്തമായ ഒരനുഭവം ഇങ്ങനെ കുറിക്കുന്നു:”എൻറെ സ്വർണമെഡൽ കുറേക്കൂടി മഹത്തരമായതെനിക്ക് നേടിത്തരുമെന്ന് ഞാൻ പ്രതീക്ഷിച്ചു.നാട്ടിലെത്തിയ ശേഷമുള്ള ഏതാനും ദിവസങ്ങൾ ആ പ്രതീക്ഷയെ ബലപ്പെടുത്തുന്നതായിരുന്നു. എന്നാൽ വൈകാതെ ഞാൻ തിക്ത യാഥാർത്ഥ്യത്തിലേക്കണർന്നു.
ഒടുവിൽ അവർ ഡൗൺ ടൗണിൽ ഭക്ഷണം കഴിക്കാൻ എനിക്കും അനുവാദം നൽകാൻ പോവുകയാണെന്ന് ഞാൻ കരുതി.അക്കാലത്ത് ലൂയിസ് വില്ലേയുൾപ്പെടെ തെക്കിലെ മിക്കവാറും എല്ലാ ഹോട്ടലുകളിലും സിനിമാശാലകളിലും കറുത്തവർക്ക് വിലക്കോ പ്രത്യേക ഭാഗമോ ഉണ്ടായിരുന്നു. പക്ഷേ പക്ഷേ എൻറെ മെഡൽ ആ വാതിലുകളെല്ലാം എനിക്കു മുന്നിൽ തുറന്നു തരുമെന്ന് ഞാൻ കരുതി.

ഒരുനാൾ ഞാനും സുഹൃത്ത് റോണിയും ലൂയിസ് വില്ലേയിലൂടെ ചുറ്റിയടിക്കുകയായിരുന്നു. പെട്ടെന്ന് മഴ പെയ്തു. അതോടെ ബൈക്ക് പാർക്ക് ചെയ്ത് ഞങ്ങളൊരു കൊച്ചു റസ്റ്റോറൻറിലേക്ക് കയറി.കസേരയിൽ ഇരുന്ന് ഞങ്ങൾ രണ്ടു ചീസ് ബർഗറിനും വാനില മിൽക്ക് ഷേയ്ക്കിനും ഓർഡർ നൽകി.
കഴുത്തിൽ സ്വർണമെഡലുമണിഞ്ഞ് ഞാനവിടെയിരുന്നത് അഭിമാനത്തോടെയായിരുന്നു. വെയിറ്റേർസ് ഞങ്ങളിരുവരെയും നോക്കിക്കൊണ്ട് പറഞ്ഞു:”ഇവിടെ നീഗ്രോകൾക്ക് ഭക്ഷണം നൽകാറില്ല.”
“ഞങ്ങൾ കഴിക്കാറുമില്ല” ഞാൻ വിനയ പൂർവ്വം പറഞ്ഞു.

Also read: കൊലയറകളും ചോരപ്പാടങ്ങളും

ഒളിമ്പിക് ചാമ്പ്യൻ കാഷ്യസ് ക്ലേ ആണ് ഞാൻ എന്ന് അവരോട് പറഞ്ഞുകൊണ്ട് റോണി എൻറെ സ്വർണമെഡലിലേക്ക് ചൂണ്ടി.അവൾ പിന്നെയും എന്നെ നോക്കി മാനേജറുടെ സമീപത്തേക്ക് പോയി. അവർ പരസ്പരം മന്ത്രിച്ചു കൊണ്ട് ഞങ്ങളുടെ നേരെ നോക്കുന്നത് കണ്ടു. ഞാരാണെന്ന് അവർക്ക് മനസ്സിലായെന്നും ഇനി ഞങ്ങൾക്ക് ഭക്ഷണം വിളമ്പുമെന്നുമായിരുന്നു ഞങ്ങൾ കരുതിയത്. പക്ഷേ, അവൾ തിരികെയെത്തി ക്ഷമാപണ വാക്കുകളോടെ ഞങ്ങളോട് തിരിച്ചു പോകാനാണ് പറഞ്ഞത്. എഴുന്നേറ്റു വാതിലിനെ നടക്കുമ്പോൾ എൻറെ ഹൃദയം പിടിക്കുകയായിരുന്നു.”

ഇത്തരം നിരവധി അനുഭവങ്ങൾ ആവർത്തിച്ചപ്പോഴാണ് അദ്ദേഹം ഓഹിയോ നദിയുടെ കുറുകെയുള്ള പാലത്തിൻറെ മദ്ധ്യത്തിൽ ചെന്ന് കഴുത്തിൽ നിന്ന് സ്വർണ്ണ മെഡൽ ഊരിയെടുത്ത് നദിയുടെ ആഴങ്ങളിലേക്ക് വലിച്ചെറിഞ്ഞത്. അതിന്നും പ്രശസ്തമായ ആ പുഴയുടെ ആഴങ്ങളിലെവിടെയോ വെള്ള മേധാവിത്വത്തിൻറെ ദുഷ്ട ധാർഷ്ട്യത്തിന്നെതിരെ കറുത്തവൻറെ അടങ്ങാത്ത പ്രതിഷേധത്തിൻറെ നിത്യ സന്ദേശമായി നിലകൊള്ളുന്നു.

Facebook Comments

ശൈഖ് മുഹമ്മദ് കാരകുന്ന്

കേരളത്തിൻറെ സാഹിത്യ, സാമൂഹ്യ, സാംസ്കാരിക മണ്ഡലങ്ങളിൽ നിറഞ്ഞുനിൽക്കുന്ന വ്യക്തിത്വത്തിൻറെ ഉടമയാണ് ശൈഖ് മുഹമ്മദ് കാരകുന്ന്. പരിശുദ്ധ ഖുർആൻ പരിഭാഷയും 13 വിവർത്തന കൃതികളും ഉൾപ്പെടെ 84 ഗ്രന്ഥങ്ങളുടെ കർത്താവാണ്. പരിഭാഷക്കും രാഷ്ട്രാന്തരീയ പാരസ്പര്യത്തിനുമുള്ള 2019ലെ ഖത്തർ ശൈഖ് ഹമദ് അന്താരാഷ്ട്ര അവാർഡ് ജേതാവാണ്. സാമൂഹ്യ പ്രവർത്തനത്തിനുള്ള കെ. കരുണാകരൻ അവാർഡ് നേടിയ ശൈഖ് മുഹമ്മദിൻറെ അഞ്ച് ഗ്രന്ഥങ്ങൾക്ക് അവാർഡുകൾ ലഭിച്ചിട്ടുണ്ട്. അഞ്ച് ഗ്രന്ഥങ്ങൾ ഇംഗ്ലീഷിലേക്കും പത്തെണ്ണം കന്നഡയിലേക്കും മൂന്നെണ്ണം തമിഴിലേക്കും ഒന്ന് മറാഠിയിലേക്കും വിവർത്തനം ചെയ്യപ്പെട്ടിട്ടുണ്ട്. കൂടാതെ നൂറുക്കണക്ക് ലേഖനങ്ങൾ ആനുകാലികങ്ങളിൽ പ്രസിദ്ധീകരിക്കപ്പെട്ടിട്ടുണ്ട്. 33 വർഷം ഐ. പി. എച്ച്. ഡയറക്ടറും ദീർഘകാലം പ്രബോധനം വാരിക ചീഫ് എഡിറ്ററുമായിരുന്ന ശൈഖ് മുഹമ്മദ് ഇപ്പോൾ ഡയലോഗ് സെൻറർ കേരളയുടെ ഡയറക്ടറും കേരള മുസ്ലിം ഹെറിറ്റേജ് ഫൗണ്ടേഷൻ ചെയർമാനും നിരവധി മത, സാമൂഹ്യ,സാംസ്കാരിക സംവിധാനങ്ങളുടെ ഭാരവാഹിയുമാണ്. ദോഹ ഇന്റർ നാഷണൽ കോൺഫറൻസ്, ദുബായ് ഇൻറർനാഷണൽ ഖുർആൻ കോൺഫ്രൻസ്, ഐ. ഐ. എഫ്. എസ്.ഒ. ഏഷ്യൻ റീജണൽ ക്യാമ്പ് തുടങ്ങിയവയിൽ സംബന്ധിച്ചിട്ടുണ്ട്. മതാന്തര സംവാദ വേദികളിലും സാംസ്കാരിക പരിപാടികളിലും സജീവ സാന്നിധ്യമായ ശൈഖ് മുഹമ്മദ് കാരകുന്ന് അറിയപ്പെടുന്ന പ്രഭാഷകനുമാണ്. 1950 ജൂലൈ 15 മഞ്ചേരിക്കടുത്ത കാരകുന്നിലെ പുലത്ത് ഗ്രാമത്തില്‍ ജനിച്ചു. പിതാവ് പുലത്ത് മുഹമ്മദ് ഹാജി . മാതാവ് ആമിന. പുലത്ത് ഗവണ്‍മെന്റ് ലോവര്‍ പ്രൈമറി സ്‌കൂള്‍, കാരകുന്ന് അപ്പര്‍ പ്രൈമറി സ്‌കൂള്‍, മഞ്ചേരി ഗവണ്‍മെന്റ് ഹൈസ്‌കൂള്‍, ഫറോക്ക് റൗദത്തുല്‍ ഉലൂം അറബിക് കോളേജ്, കോഴിക്കോട് എല്‍.ടി.ടി. സെന്റര്‍ എന്നിവിടങ്ങളില്‍ വിദ്യാഭ്യാസം. മൊറയൂര്‍ വി.എച്ച്.എം.ഹൈസ്‌കൂള്‍, എടവണ്ണ ഇസ്ലാഹിയാ ഓറിയന്റല്‍ ഹൈസ്‌കൂള്‍ എന്നിവിടങ്ങളില്‍ അദ്ധ്യാപകനായി ജോലി ചെയ്തു. ഇപ്പോള്‍ ജമാഅത്തെ ഇസ്ലാമി കേന്ദ്ര പ്രതിനിധി സഭാംഗം, കേരള സംസ്ഥാന കൂടിയാലോചനാ സമിതി അംഗം ,എന്നീ ചുമതലകള്‍ക്കൊപ്പം സംസ്ഥാന സെക്രട്ടറി കൂടിയാണ്.സുഊദി അറേബ്യ , യു.എ.ഇ ,ഒമാന്‍ , കുവൈത്ത്, ഖത്തര്‍ , ബഹ്‌റൈന്‍ , സിംഗപ്പൂര്‍, ശ്രീലങ്ക, മലേഷ്യ എന്നീ നാളുകള്‍ സന്ദര്‍ശിച്ചു. ആമിന ഉമ്മു അയ്മനാണ് കുടുംബിനി. അനീസ് മുഹമ്മദ് , ഡോക്ടര്‍ അലീഫ് മുഹമ്മദ് , ഡോക്ടര്‍ ബാസിമ , അയമന്‍ മുഹമ്മദ് എന്നിവര്‍ മക്കളും ഡോക്ടര്‍ അബ്ദുറഹമാന്‍ ദാനി, ഷമിയ്യത് , ആയിഷ നസീബ, ഇബ്തിസാം എന്നിവര്‍ ജാമാതാക്കളുമാണ്.

Related Articles

Back to top button

Adblock Detected

Please consider supporting us by disabling your ad blocker