Art & Literature

സൂര്യോദയവും കാത്ത്..

സ്വഛമായി നിലാവ്‌ പരത്തിയിരുന്ന
പൂര്‍‌ണ്ണ ചന്ദ്രനില്‍ കരി നിറം നിഴലിട്ടു.
കൃഷ്‌ണ പക്ഷത്തിനു ശേഷം
കാര്‍മേഘ പാളികളാലാവൃതമായി
തിങ്കള്‍ അവ്യക്തമായി കാണപ്പെട്ടു.
നറും നിലാവിന്റെ ശീതള ഛായയില്‍
സ്‌തുതി ഗീതമാലപിച്ചിരുന്നവരുടെ
ചങ്കു പൊട്ടി..

അവരുടെ ദീന രോധനം
മേഘ ഗര്‍‌ജ്ജനം കവര്‍‌ന്നു.
അവരുടെ കണ്ണീര്‍ ചാലില്‍
ഗോപകുമാരന്മാര്‍
ഗോക്കളെ കുളിപ്പിച്ചു.
അവരുടെ അസ്ഥികള്‍കൊണ്ട്‌
ചക്രവും,ശം‌ഖും ഗദയുമുണ്ടാക്കി.
അവരുടെ കരളുകള്‍ പറിച്ചെടുത്ത്
താമരയുണ്ടാക്കി.
അവരുടെ രക്തം
തേരാളികളെ കുടിപ്പിച്ച്‌
മദോന്മത്തരാക്കി
അവരുടെ ചില്ലുടഞ്ഞ കിനാക്കള്‍ കൊണ്ട്‌
രുദ്രാക്ഷ മാലയും
ജപമാലയും
ഉണ്ടാക്കി.
ഹിമാലയം ഉരുകി ഒലിച്ചു.
ഗം‌ഗയും യമുനയും
കര കവിഞ്ഞൊഴുകി.

ഇനി വീശാനിരിക്കുന്നു
മരുക്കാറ്റ്‌…
കപട കാവി സന്ധ്യയെ
വിളറി പിടിപ്പിക്കുന്ന കാറ്റ്‌
ഉദിക്കാനിരിക്കുന്നു
പുതിയ പ്രഭാതവും പ്രദോഷവും
പൂര്‍‌ണ്ണ നിലാവുള്ള രാത്രിയും.
………….
എന്റെ മാണിക്യ ചെപ്പ്‌ എന്ന കവിതാ സമാഹാരത്തിലെ കവിത.ബാബരി മസ്‌ജിദ്‌ വിഷയവുമായി ബന്ധപ്പെട്ട്‌ സവര്‍‌ണ്ണ ഫാഷിസത്തിന്റെ സകലമാന രൗദ്രഭാവങ്ങളും മറ നീക്കി പ്രത്യക്ഷപ്പെട്ടു കൊണ്ടിരുന്ന തൊണ്ണൂറുകളിലെ  രചന.

Facebook Comments
Related Articles

അസീസ് മഞ്ഞിയില്‍

തൃശൂര്‍ ജില്ലയിലെ മുല്ലശ്ശേരി, രായംമരയ്ക്കാര്‍ വീട്ടില്‍ മഞ്ഞിയില്‍ ഖാദര്‍, ഐഷ ദമ്പതികളുടെ പത്ത് മക്കളില്‍ ആറാമത്തവനായി 1959 ലാണ് ജനനം. ബ്ലോഗുകളില്‍ സജീവമായ മഞ്ഞിയിലിന്റെ മാണിക്യച്ചെപ്പ് എന്ന കവിതാ സമാഹാരം 1992-ല്‍ പ്രതീക്ഷ തൃശ്ശൂര്‍ പുറത്തിറക്കിയിട്ടുണ്ട്. പ്രവാസി നാടകക്കാരന്‍ അഡ്വ:ഖാലിദ് അറയ്ക്കല്‍ എഴുതി അവതരിപ്പിച്ച നാടകങ്ങള്‍ക്ക് വേണ്ടി ഗാനരചന നിര്‍വഹിച്ച ഇദ്ദേഹം എ.വി എം ഉണ്ണിയുടെ ഉമറുബ്‌നു അബ്ദുള്‍ അസീസ് എന്ന ചരിത്രാഖ്യായികയ്ക്ക് വേണ്ടിയും ഗാനങ്ങളെഴുതിയിട്ടുണ്ട്.എണ്‍പതുകളില്‍ ബോംബെയില്‍ നിന്നിറങ്ങിയിരുന്ന ഗള്‍ഫ് മലയാളിയില്‍ നിന്നു തുടങ്ങി നിരവധി ഓണ്‍ലൈന്‍ മാഗസിനുകളിലും ആനുകാലികങ്ങളിലും എഴുതുന്നുണ്ട്. തനിമ കലാസാഹിത്യവേദി ഖത്തര്‍ ഘടകം മുന്‍ ഡയറക്ടര്‍ കൂടിയാണ് മഞ്ഞിയില്‍.സുബൈറയാണ് ഭാര്യ. അകാലത്തില്‍ പൊലിഞ്ഞുപോയ ബാലപ്രതിഭ അബ്‌സ്വാര്‍, അന്‍സാര്‍, ഹിബ, ഹമദ്, അമീന എന്നിവരാണ് മക്കള്‍.

Check Also

Close
Close
Close