മനാമ: നല്ല വായനയെ പ്രോല്സാഹിപ്പിക്കുകയെന്ന ഉദ്ദേശത്തോടെ ഫ്രന്റ്സ് വനിതാവിംഗ് നടത്തുന്ന ആരാമം കാമ്പയിന് മനാമ ഏരിയയില് തുടക്കമായി. വനിതകൾക്ക് ദിശാബോധം നൽകുന്നതിന് വനിതകളാൽ നടത്തപ്പെടുന്ന മാസികയെന്ന നിലക്ക് സ്ത്രീജനങ്ങൾക്കിടയിൽ വർധിച്ച സ്വീകാര്യതയാണ് ആരാമത്തിന് ലഭിച്ചു കൊണ്ടിരിക്കുന്നത്. സ്ത്രീകളിൽ സൃഷ്്ടിപരമായ വായനാശീലം വളർത്തുവാനും അവരിൽ ധാർമിക വിജ്ഞാനവും സാമൂഹികാവബോധവും ശക്തിപ്പെടുത്താനും സർഗാത്മക കഴിവുകൾ പോഷിപ്പിക്കാനൂം ആരാമം ശക്തമായ ഇടപെടലാണ് നടത്തിക്കൊണ്ടിരിക്കുന്നത്. മലയാളത്തിലെ ഇതര വനിതാ മാസികകളുടേതിൽനിന്ന് വ്യത്യസ്തമായി പൈങ്കിളി രചനകളിൽ നിന്ന് മുക്തമായ രീതിയാണ് സ്വീകരിച്ചു കൊണ്ടിരിക്കുന്നത്. ഫീച്ചറുകൾ ലേഖനങ്ങൾ, കഥകൾ, കവിതകൾ, അഭിമുഖങ്ങൾ, തുടങ്ങിയവക്ക് പുറമെ ആഗോളതലത്തിൽ ശ്രദ്ധ നേടിയ വനിതകളുടെ ചരിത്രം, വനിതാലോകം, നിയമവേദി, കൃഷി, ആരോഗ്യം, പാചകം, കഥ, നോവലെറ്റ് തുടങ്ങിയ പംക്തികളും പ്രസിദ്ധീകരിച്ചുവരുന്നുവെന്നതാണ് ആരാമത്തിെൻറ പ്രത്യേകത. മാർച്ച് 15- മുതൽഏപ്രിൽ 15 വരെ നടത്തുന്ന കാമ്പയിൻ മനാമ ഏരിയ തല ഉദ്ഘാടനം മനാമ ഏരിയ കൺവീനർ നദീറ ഷാജി ജസീല ഷറീജിന് നൽകി നിർവഹിച്ചു.