ബഗ്ദാദ്: ഇറാഖ് സൈന്യം ഇറാൻ പിന്തുണയുള്ള അർധസൈനിക വിഭാഗം മുൻ അംഗത്തെ സൈന്യത്തിൽ ഉന്നത ഉദ്യോഗസ്ഥനാക്കാൻ പരിശീലിപ്പിക്കുകയാണെന്ന് ആറ് ഗവൺമെന്റ്-സുരക്ഷാ ഉദ്യോഗസ്ഥരെ ഉദ്ധരിച്ച് റോയിറ്റേഴ്സ് റിപ്പോർട്ട് ചെയ്തു. പ്രതിഷേധക്കാരെ കൊലപ്പെടുത്തിയതുമായി ബന്ധപ്പെട്ട് ഇറാൻ പിന്തുണയുള്ള അർധസൈനിക വിഭാഗത്തിന് യു.എസ് ഉപരോധം ഏർപ്പെടുത്തിയിരുന്നു. അബു സൈനബ് അല്ലാമി എന്നറിയപ്പെടുന്ന ഹുസൈൻ ഫാലിഹ് അസീസിനെ ഇറാഖ് സൈന്യത്തോടൊപ്പം ഈജിപ്തിലേക്ക് ഒരു വർഷം നീണ്ടുനിൽക്കുന്ന പരിശീലനത്തിനാണ് അയച്ചിരിക്കുന്നത്. സാധാരണഗതിയിൽ രാജ്യത്തെ സൈനിക ഉദ്യോഗസ്ഥർക്കായി നീക്കിവെച്ചിട്ടുളള പരിശീലനമാണിത്.
പ്രതിരോധ മന്ത്രാലയത്തിന്റെ രേഖയിൽ അടുത്ത വേനൽക്കാലം വരെ പരിശീലനനത്തിൽ പങ്കെടുക്കുന്ന ഉദ്യോഗസ്ഥരുടെ പട്ടികയിൽ അബു സൈനബ് അല്ലാമിയുടെ പേര് കണ്ടതായി റോയിറ്റേഴ്സ് വാർത്താ ഏജൻസി റിപ്പോർട്ട് ചെയ്തു.
