തെഹ്റാൻ: യു.എസ് പ്രസിഡൻഷ്യൽ തെരഞ്ഞെടുപ്പിലെ ജോ ബൈഡന്റെ വിജയത്തിൽ പ്രതികരണവുമായി ഇറാൻ രാഷ്ട്രീയ പ്രമുഖർ. യു.എസ് സ്വതന്ത്ര ജനാധിപത്യത്തിന്റെ വികൃത മുഖത്തിനൊരു ഉദാഹരമാണിത്. ഫലം എന്തായിരുന്നാലും ഒരു കാര്യം കൃത്യമാണ്. യു.എസ് ഭരണവ്യവസ്ഥയുടെ രാഷ്ട്രീയവും സാംസ്കാരികവും ധാർമികവുമായ തകർച്ചയാണത് -ഇറാൻ പരമോന്നത നേതാവ് ആയത്തുല്ല അലി ഖാംനഈ ട്വിറ്ററിൽ കുറിച്ചു. യു.എസ് മാധ്യമങ്ങൾ ബൈഡന്റെ വിജയം റിപ്പോർട്ട് ചെയ്ത ഉടൻ, കഴിഞ്ഞ ആഴ്ചയിൽ നടത്തിയ പ്രസ്താവനയുടെ ഒരു ഭാഗം ട്വിറ്ററിൽ വീണ്ടും പോസ്റ്റ് ചെയ്താണ് ഇറാൻ പരമോന്നത നേതാവ് ആയത്തുല്ല അലി ഖാംനഈ പ്രതികരിച്ചത്. കഴിഞ്ഞ ആഴ്ചയിൽ യു.എസ് തെരഞ്ഞെടുപ്പിനെ കുറിച്ച് “എന്തൊരു കാഴ്ച” എന്ന പരാമർശം അദ്ദേഹം നടത്തിയിരുന്നു.
ഇറാനുമായുള്ള പ്രസിഡന്റ് ഡൊണൾഡ് ട്രംപിന്റെ നയങ്ങളിൽ ജോ ബൈഡൻ ഭേദഗതികൊണ്ടുവരണമെന്ന് ഇറൻ പ്രസിഡന്റ് ഹസൻ റൂഹാനി പറഞ്ഞതായി ദേശീയ മാധ്യമങ്ങൾ ഞായറാഴ്ച റിപ്പോർട്ട് ചെയ്തു. കഴിഞ്ഞ കാല പ്രവൃത്തികൾ മെച്ചപ്പെടുത്തുന്നതിനും, അന്തരാഷ്ട്ര നിയമങ്ങൾ പാലിച്ച് അന്താരാഷ്ട്ര പ്രതിബദ്ധത കെെകൊള്ളുന്നതിനും യു.എസ് ഭരണകൂടത്തിനുള്ള അവസരമാണ് ബൈഡൻ -അദ്ദേഹം പറഞ്ഞു.