ന്യൂഡല്ഹി: രാജിക്ക് പിന്നാലെ പ്രധാനമന്ത്രി നരേന്ദ്ര മോദിയെ വാഴ്ത്തി ഗുലാം നബി ആസാദ്. മനുഷ്യത്വം ഉള്ള ആളാണ് നരേന്ദ്ര മോദി. പ്രധാനമന്ത്രിക്ക് തന്നോട് മനുഷ്യത്വത്തോടെ പെരുമാറാന് സാധിച്ചു. താനും മോദിയും ഗുജറാത്തിലെ ജനങ്ങള്ക്ക് വേണ്ടി കണ്ണീരൊഴുക്കി. തന്റെ വിഷമങ്ങള് മനസിലാക്കാനും തന്നെ കേള്ക്കാനും പ്രധാനമന്ത്രിക്ക് കഴിഞ്ഞെന്നും ആസാദ് പറഞ്ഞു. സ്വകാര്യ ചാനലിന് നല്കിയ അഭിമുഖത്തിലാണ് അദ്ദേഹം മോദിയെ വാഴ്ത്തി രംഗത്തെത്തിയത്.
കോണ്ഗ്രസിനും രാഹുല് ഗാന്ധിക്കുമെതിരെ ആരോപണങ്ങള് ഉന്നയിച്ച അദ്ദേഹം കശ്മീര് ആസ്ഥാനമാക്കി പുതിയ രാഷ്ട്രീയ പാര്ട്ടി രൂപീകരിക്കുമെന്നും ബി.ജെ.പിയിലേക്ക് പോകില്ലെന്നും പറഞ്ഞു.
താന് കോണ്ഗ്രസില് നിന്ന് പുറത്തുപോയതല്ല. പുറത്താക്കിയത് പോലെയാണ്. തന്റെ രാജിക്കത്തിന് കോണ്ഗ്രസ് ദേശീയ നേതൃത്വം നല്കിയ മറുപടിയെയും ആസാദ് പറഞ്ഞു. കോണ്ഗ്രസില് നിന്ന് പുറത്തുപോകാന് നിര്ബന്ധിതനായതാണ്. തന്നെ ആവശ്യമില്ലെന്ന തോന്നലാണ് കോണ്ഗ്രസ് നേതൃത്വം നല്കിയത്.
സോണിയാ ഗാന്ധിക്കയച്ച രാജിക്കത്തില് രാഹുല് ഗാന്ധിക്കെതിരെ രൂക്ഷ വിമര്ശനമുന്നയിച്ചാണ് ഗുലാം നബി ആസാദ് പാര്ട്ടി വിട്ടത്. രാഹുല് ഗാന്ധിയുടെ പക്വതയില്ലായ്മയും പാര്ട്ടിയിലെ കണ്സള്ട്ടേറ്റീവ് സംവിധാനത്തെ തകര്ത്തുവെന്നും കത്തില് ആരോപിച്ചിരുന്നു.