കോഴിക്കോട് : കഴിഞ്ഞ ഏതാനും ദിവസങ്ങളായി മാധ്യമങ്ങള്‍ ചര്‍ച്ചചെയ്യുന്ന പ്രധാന വാര്‍ത്തകളി ലൂടെ ‘ഇസ്‌ലാം പേടി’ വളര്‍ത്താനുള്ള ശ്രമങ്ങള്‍ സജീവമാണെന്ന് ജമാഅത്തെ ഇസ്‌ലാമി കേരള അമീര്‍ എം.ഐ.അബ്ദുല്‍ അസീസ് പറഞ്ഞു. എസ്.ഐ.ഒ സംസ്ഥാന കമ്മിറ്റി ശാന്തപുരം അല്‍ ജാമിഅഃ അല്‍ ഇസ്‌ലാമിയ്യയില്‍ ഗള്‍ഫ് വിദ്യാര്‍ഥികള്‍ക്കുവേണ്ടി സംഘടിപ്പിച്ച ‘കോമ്പസ് 2016’ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇസ്‌ലാമോഫോബിയ വളര്‍ത്താന്‍ ശ്രമിക്കുന്നവരെ തിരിച്ചറിയുകയും അവര്‍ക്കെതിരെ വിദ്യാര്‍ഥി സമൂഹത്തില്‍ നിന്ന് പ്രതിഷേധങ്ങള്‍ ഉയരണമെന്നും അമീര്‍ പറഞ്ഞു. മുസ്‌ലിം പണ്ഡിതന്മാരെ വേട്ടയാടുന്നതിനുള്ള ശ്രമങ്ങള്‍ ആശങ്കാജനകമാണ്. ഇതിലൂടെ അന്താരാഷ്ട്രതലത്തില്‍ സാമ്രാജത്വ ശക്തികളും ഇന്ത്യയിലെ സംഘപരിവാര്‍ രാഷ്ട്രീയവും ശ്രമിക്കുന്നത് ഇസ്‌ലാമിനെ തകര്‍ക്കാനാണ്. വിദ്യാഭ്യാസ രംഗത്തെ കാവിവല്‍ക്കരിക്കുന്നതിലൂടെ ഇന്ത്യയില്‍ സവര്‍ണ്ണാധിപത്യം ശക്തിപെടുത്താനാണ് ബി.ജെ.പി സര്‍ക്കാര്‍ ശ്രമിക്കുന്നത്. ഇത് തിരിച്ചറിഞ്ഞ് പ്രതിരോധിക്കാനുള്ള ശ്രമങ്ങളാണ് വിദ്യാര്‍ഥി സമൂഹം ആര്‍ജിക്കേണ്ടത്. അടിച്ചമര്‍ത്തപ്പെട്ടവരുടെ ചരിത്രം മുഖ്യധാരയിലേക്ക് കൊണ്ടുവരാന്‍ ആവശ്യമായ പഠനങ്ങള്‍ ഇന്ത്യയിലും അന്താരാഷ്ട്ര തലത്തിലും നടക്കേണ്ടതുണ്ട് എന്ന് അദ്ദേഹം പറഞ്ഞു.
എസ്.ഐ.ഒ സംസ്ഥാന പ്രസിഡന്റ് നഹാസ് മാള കോമ്പസിന് അദ്ധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി ഷംസീര്‍ ഇബ്രാഹിം പരിപാടിയില്‍ സ്വാഗതം പറഞ്ഞു. വിവിധ സെക്ഷനുകളിലായി ജി.ഐ.ഒ വിന്റെ സംസ്ഥാന പ്രസിഡന്റ് പി. റുക്‌സാന, ഇല്യാസ് മൗലവി, അബ്ബാസ് അലി, നാസര്‍ ചെറുകര, ഡോ. വി. ഹിക്മത്തുല്ലാ, നസുറുല്ലാ വാഴക്കാട്, ഹാമിദ് അലി തുടങ്ങിയവര്‍ സംസാരിച്ചു. എസ്.ഐ.ഒ സംസ്ഥാന സമിതി അംഗങ്ങളായ ഷബീര്‍ കൊടുവള്ളി, ജുമൈല്‍ പി.പി., തൗഫീഖ് മമ്പാട്, സജീര്‍ ടി.സി., ആദില്‍ എ., അംജദ് അലി, ഷിയാസ് പെരുമാതുറ, ശുഐബ് സി.ടി, ഫാരിസ് ഒ.കെ, മുജീബ് റഹ്മാന്‍, റഹീം ചേന്ദമംഗലൂര്‍, എന്നിവര്‍ കോമ്പസിന് നേതൃത്വം നല്‍കി. എ.ടി. ഷറഫുദ്ദീന്‍ സമാപന പ്രഭാഷണം നടത്തി. കോമ്പസ് ഡയറക്ടര്‍ ജസീം സുല്‍ത്താന്‍ നന്ദി പറഞ്ഞു. വിവിധ ഗള്‍ഫ് രാജ്യങ്ങളില്‍ നിന്ന് നൂറിലധികം മലയാളി വിദ്യാര്‍ഥികളാണ് ക്യാമ്പില്‍ പങ്കെടുത്തത്.
Menu
