മോസ്‌കോ: ഇസ്ലാമിക് ബാങ്കിങ് രീതി മാതൃകയാക്കാനൊരുങ്ങി റഷ്യ. പ്രധാനമായും മുസ്ലീം കിഴക്കന്‍ പ്രദേശങ്ങളായ നാല് മേഖലകളിലാണ് ആദ്യ പടിയായി ഇത് നടപ്പാക്കുന്നത്. ചെച്‌നിയ, ഡാഗെസ്താന്‍, ബാഷ്‌കോര്‍ട്ടോസ്ഥാന്‍, ടാറ്റര്‍സ്ഥാന്‍ എന്നിവിടങ്ങളില്‍ റഷ്യ ഇസ്ലാമിക് ബാങ്കിംഗ് രീതികള്‍ നടപ്പിലാക്കുന്നതിലേക്ക് നീങ്ങുന്നത്.
റഷ്യയില്‍ ഇസ്ലാമിക് ഫിനാന്‍സ് പ്രോത്സാഹിപ്പിക്കുന്നതിന് ഉദ്ദേശിച്ചുള്ള ഒരു പുതിയ ബില്‍ ഇതിനകം ദുമ സംസ്ഥാനത്ത് അംഗീകരിച്ചിട്ടുണ്ട്. പങ്കാളിത്ത ധനകാര്യ സ്ഥാപനങ്ങള്‍ എന്ന് വിളിക്കപ്പെടുന്ന ബാങ്ക് ഓഫ് റഷ്യയും ഇതിന്റെ ഭാഗമാകും. ഇതോടെ സമ്പദ് വ്യവസ്ഥ വികസിക്കുമെന്നാണ് റഷ്യ കരുതുന്നത്.
മിഡില്‍ ഈസ്റ്റ് മോണിറ്റര്‍ ആണ് വാര്‍ത്ത റിപ്പോര്‍ട്ട് ചെയ്തത്. ഇസ്ലാമിക് ബാങ്കിംഗിലേക്കുള്ള ഈ മാറ്റം, യുക്രെയ്‌നിലെ സംഘര്‍ഷം കാരണം പാശ്ചാത്യ രാജ്യങ്ങളുടെ ഉപരോധങ്ങളോടുള്ള പ്രതികരണമാണെന്നും റിപ്പോര്‍ട്ടില്‍ പറയുന്നുണ്ട്. അതിനാല്‍, മുസ്ലിം ലോകത്ത് കൂടുതല്‍ ലാഭകരമായ വ്യാപാരം തേടിയാണ് റഷ്യ പശ്ചിമേഷ്യയിലേക്കും ഏഷ്യയിലേക്കും തിരിയുന്നതെന്നും റിപ്പോര്‍ട്ടിലുണ്ട്.
ദി ഇക്കണോമിസ്റ്റിന്റെ 2014-ലെ റിപ്പോര്‍ട്ട് അനുസരിച്ച്, ശരീഅത്ത് നിയമം അനുസരിക്കുന്ന ധനകാര്യ സ്ഥാപനങ്ങള്‍ ലോകത്തെ ആസ്തിയുടെ 1% കൈവശം വച്ചിട്ടുണ്ട്.
