റിയാദ്: സൗദിയില്‍ വാട്‌സാപ് ഗ്രൂപ്പില്‍ നിന്നും ഒരാളെ നീക്കം ചെയ്യുന്നത് ജയില്‍ ശിക്ഷക്കും കനത്ത പിഴക്കും കാരണമാകുമെന്ന് റിപ്പോര്‍ട്ട്. സൗദിയിലെ നിയമ ഉപദേഷ്ടാവിനെ ഉദ്ധരിച്ച് മിഡിലീസ്റ്റ് ഐ ആണ് വാര്‍ത്ത റിപ്പോര്‍ട്ട് ചെയ്തത്.

വാട്‌സാപില്‍ നിരുപദ്രവകരമെന്ന് തോന്നുന്ന പ്രവൃത്തിക്ക് സൗദികള്‍ക്ക് കാര്യമായ പ്രത്യാഘാതങ്ങള്‍ നേരിടേണ്ടിവരുമെന്ന് നിയമ ഉപദേശകന്‍ അഹ്‌മദ് അജബ് മക്ക ന്യൂസിനോട് പറഞ്ഞു.

വിവര സാങ്കേതിക വിദ്യയിലൂടെയും സോഷ്യല്‍ മീഡിയയിലൂടെയും മറ്റുള്ളവരെ അപകീര്‍ത്തിപ്പെടുത്തുകയും ഉപദ്രവിക്കുകയും ചെയ്യുന്നവര്‍ക്ക് പിഴയും ജയില്‍ ശിക്ഷയും ലഭിക്കുമെന്ന് സൗദി അറേബ്യയിലെ സൈബര്‍ ക്രൈം വിരുദ്ധ നിയമത്തിലെ ഖണ്ഡിക ഉദ്ധരിച്ചുകൊണ്ടാണ് അദ്ദേഹം പറഞ്ഞത്.

ഒരു വാട്സ്ആപ്പ് ഗ്രൂപ്പില്‍ നിന്ന് നീക്കം ചെയ്യപ്പെട്ട ആരെങ്കിലും ബന്ധപ്പെട്ട അധികാരികള്‍ക്ക് പരാതി നല്‍കിയാല്‍, നീക്കം ചെയ്യപ്പെട്ടതിന് ഉത്തരവാദിയായ വ്യക്തിക്ക് ഒരു വര്‍ഷം വരെ തടവും 500,000 റിയാല്‍ (13,300 ഡോളര്‍) പിഴയും ലഭിക്കുമെന്നും അദ്ദേഹം വാദിച്ചു.

മെസേജിങ് ഗ്രൂപ്പില്‍ നിന്ന് ഒരാളെ ഇല്ലാതാക്കുന്നത് ‘ഒരു വ്യക്തിയുടെ അഭിമാനം കുറയ്ക്കുകയും അവന്റെ സ്ഥാനത്തെ തരംതാഴ്ത്തുകയും ചെയ്യുന്ന ധാര്‍മ്മിക ദോഷത്തിന്’ കാരണമായേക്കാമെന്നും അദ്ദേഹം വ്യക്തമാക്കി, അതേസമയം, ഒരു ഗ്രൂപ്പില്‍ നിന്ന് ഒരാള്‍ സ്വമേധയാ പുറത്തുകടക്കുന്നതുകൊണ്ട് നിയമപരമായ പ്രത്യാഘാതങ്ങള്‍ ഉണ്ടാകില്ലെന്നും അദ്ദേഹം വ്യക്തമാക്കി.

????വാട്സാപ് ഗ്രൂപ്പില്‍ അംഗമാവാൻ: https://chat.whatsapp.com/KcaSUOBtFi97cUjnUYXVVV