വത്തിക്കാൻ സിറ്റി: അടുത്ത വർഷം ഫ്രാൻസിസ് മാർപാപ്പ ഇറാഖ് സന്ദർശിക്കുമെന്ന് വത്തിക്കാൻ. ബഗ്ദാദ്, ഇർബിൽ, മോസിൽ അടങ്ങുന്ന അഞ്ചോളം സ്ഥലങ്ങൾ മാർച്ച് അഞ്ചിനും എട്ടിനുമിടയിലാണ് മാർപാപ്പ സന്ദർശിക്കുന്നതെന്ന് വത്തിക്കാൻ അറിയിച്ചു. യാത്രാ പരിപാടി യഥാസമയം അറിയിക്കുന്നതാണ്. ലോകവ്യാപകമായ ആരോഗ്യ അടിയന്തരാവസ്ഥയുടെ മാറ്റം പരിഗണിക്കുന്നതുമാണ് -വത്തിക്കാൻ വക്താവ് മാറ്റിയോ ബ്രൂണി തിങ്കളാഴ്ച പറഞ്ഞു.
അടുത്തയാഴ്ച 84 വയസ്സ് തികയുന്ന മാർപാപ്പ നിനെവേ പ്രവിശ്യയിലെ ഖരഖോഷും സന്ദർശിക്കുമെന്ന് മാറ്റിയോ ബ്രൂണി കൂട്ടിചേർത്തു. പോപ്പിന്റെ സന്ദർശനത്തെ ഇറാഖ് ഭരണകൂടം സ്വാഗതം ചെയ്തു. ഇത് ഇറാഖിനും മുഴുവൻ പ്രദേശത്തിനുമുള്ള സമാധാന സന്ദേശത്തിന്റെ പ്രതീകമാണ് -ഇറാഖ് വിദേശകാര്യ മന്ത്രാലയം വ്യക്തമാക്കി.