അങ്കാറ: ഭീഷണികൾക്ക് തുർക്കി വഴങ്ങില്ലെന്ന് പ്രസിഡന്റ് റജബ് ത്വയ്യിബ് ഉർദുഗാൻ വ്യക്തമാക്കി. തുർക്കിയുടെ സമുദ്ര പര്യവേക്ഷണവുമായി ബന്ധപ്പെട്ട് ഗ്രീസുമായി നിലനിൽക്കുന്ന തർക്കം ഈ ആഴ്ച യൂറോപ്യൻ യൂണിയൻ ഉച്ചകോടി പരിഹരിക്കാനിരിക്കുകയാണ്. കിഴക്കൻ മെഡിറ്ററേനിയൻ കടലിലെ അവകാശങ്ങളിൽ നിന്ന് തുർക്കിയെ ഒഴിവാക്കുന്ന ഒരു പദ്ധതിയും തയാറെടുപ്പും സ്വീകാര്യമല്ലെന്ന് ഉർദുഗാൻ തിങ്കളാഴ്ച പറഞ്ഞു.
ഗ്രീസിനും സൈപ്രസിനുമിടയിൽ തർക്കം നിലനിൽക്കുന്ന മേഖലയിൽ നാറ്റോ സഖ്യകക്ഷിയായ തുർക്കി പ്രകൃതി വാതക പര്യവേക്ഷണം നടത്തികൊണ്ടിരിക്കുന്നതാണ് മേഖലയിൽ അസ്വസ്ഥത വർധിപ്പിച്ചിരിക്കുന്നത്. ഗ്രീസിന്റെയും, ഗ്രീക്ക് സൈപ്രിയേറ്റ് ഭരണകൂടത്തിന്റെയും സമുദ്രാതിർത്തി അവകാശങ്ങളെ തുർക്കി തള്ളിക്കളഞ്ഞു. എല്ലാ പ്രശ്നങ്ങളും അന്താരാഷ്ട്ര നിയമത്തിലൂടെ പരിഹരിക്കുന്നതിന് അനുകൂലമാണെന്ന് തുർക്കി വ്യക്തമാക്കി.