രണ്ടു ദിവസം പിന്നിട്ട് മൂന്നാം നാള്‍ പുതിയ ചരിത്രത്തിന്റെ ഭാഗമാകാനൊരുങ്ങുന്ന ഖത്തറിലെങ്ങും ഇപ്പോള്‍ ആഘോഷത്തിന്റെ ഉത്സവച്ചായയാണ്. ഖത്തറെന്ന കൊച്ചുരാഷ്ട്രത്തിന്റെ മുക്കുമൂലകളിലെല്ലാം ഇപ്പോള്‍ ഫുട്‌ബോള്‍ വസന്തം എന്ന ഒരു വികാരം മാത്രമേ ഉള്ളൂ. അതിനെതിരായ പ്രചാരണങ്ങളും കൊണ്ടുപിടിച്ച ശ്രമങ്ങളുമെല്ലാം ആഘോഷമയത്താല്‍ മുങ്ങിയിരിക്കുകയാണ് ഖത്തറില്‍. ശനിയാഴ്ച ഖത്തര്‍ പ്രാദേശിക സമയം വൈകീട്ട് ഏഴു മണിക്ക് മുഴങ്ങുന്ന കിക്കോഫ് വിസിലിനായി അക്ഷമരായി കാത്തിരിക്കുകയാണ് ഖത്തറിലെ മുഴുവന്‍ ഫുട്‌ബോള്‍ ആരാധകരും.
കിക്കോഫിന് മുന്നോടിയായി അല്‍ ബിദ പാര്‍ക്കില്‍ ഒരുക്കിയ ഫാന്‍ ഫെസ്റ്റിവലില്‍ ബുധനാഴ്ച ടെസ്റ്റ് റണ്‍ നടത്തി. പൊതുജനങ്ങള്‍ക്കായി കൂറ്റന്‍ സ്‌ക്രീനില്‍ എല്ലാ മത്സരങ്ങളുടെയും തത്സമയ സ്‌ക്രീനിങ്ങ് നടത്തുന്ന ഏറ്റവും വലിയ ഒത്തുചേരല്‍ കേന്ദ്രമാണ് ഫാന്‍ സോണ്‍. നാല്‍പതിനായിരം പേര്‍ക്ക് ഒരേസമയം ഇവിടെ ഒരുമിച്ചുകൂടാനുള്ള സൗകര്യമാണ് സംഘാടകര്‍ ഒരുക്കിയിരിക്കുന്നത്. 20,000 പേരാണ് ടെസ്റ്റ് റണ്ണില്‍ പങ്കെടുത്തതെന്ന് സംഘാടകര്‍ പറഞ്ഞു.
ലോകകപ്പ് മത്സരങ്ങളുടെ തത്സമയ സ്‌ക്രീനിങ്ങിനായി ഒരു കൂറ്റന്‍ സ്‌ക്രീന്‍ ആണ് പ്രധാന വേദി. ആധുനിക ദൃശ്യ-ശ്രാവ്യ സാങ്കേതിക വിദ്യ ഒത്തിണക്കിയാണ് ഇവിടം സജ്ജീകരിച്ചിരിക്കുന്നത്. ഇതിന്റെ പശ്ചാത്തലത്തിലായി ദോഹയുടെ സ്‌കൈലൈനിന്റെ വിശാലമായ കാഴ്ചയും കാണാനാകും. ഇതിനു പുറമെ ഫാന്‍ സോണില്‍ ഫുഡ് കോര്‍ട്ടുകള്‍, സാംസ്‌കാരിക പ്രദര്‍ശനങ്ങള്‍, ഫിഫ മ്യൂസിയം എന്നിവയും സന്ദര്‍ശിക്കുന്ന ആരാധകര്‍ക്കായി സജ്ജീകരിച്ചിട്ടുണ്ട്.
കഴിഞ്ഞ ദിവസം ട്രയലില്‍ പങ്കെടുത്തവരെല്ലാം ഫിഫയുടെയും ഖത്തറിനെയും സംഘാടന മികവിനെ വാനോളം പുകഴ്്ത്തി. ലോകകപ്പ് ചരിത്രത്തില്‍ തന്നെ ഇത്രയും വലിയ ഫാന്‍സോണ്‍ ഒരുക്കിയിട്ടില്ലെന്നാണ് വിവിധ രാജ്യത്തുനിന്നെത്തിയ ഫുട്‌ബോള്‍ പ്രേമികള്‍ ഒരേ സ്വരത്തില്‍ പറഞ്ഞത്.
അല്‍ജസീറയുടെ സോറിന്‍ ഫുര്‍കോയിയും ഉസൈദ് സിദ്ദീഖിയും പകര്‍ത്തിയ ചിത്രങ്ങള്‍ കാണാം….
