Vazhivilakk

യുക്തിവാദികളും ആത്മഹത്യയും

ദൈവ വിശ്വാസവും മതബോധവും ഇല്ലാത്തവരെല്ലാം തങ്ങളുടെ എല്ലാ കാര്യങ്ങൾക്കും അടിസ്ഥാനമായി സ്വീകരിക്കുന്നത് സ്വന്തം ബുദ്ധിയും ചിന്തയും യുക്തിയുമാണ്. അതുകൊണ്ടുതന്നെ വിശ്വാസികളല്ലാത്തവരെല്ലാം യുക്തിവാദികളാണ്. അവരോ മറ്റുള്ളവരോ അതംഗീകരിച്ചാലും ഇല്ലെങ്കിലും ശരി.

വിശ്വാസികൾ പ്രതിസന്ധി ഘട്ടങ്ങളിൽ ദൈവത്തിൽ അഭയം തേടുന്നു. എന്നാൽ യുക്തിവാദികളിൽ പലരും കടുത്ത പ്രയാസങ്ങളെയും പ്രതിസന്ധികളെയും അഭിമുഖീകരിക്കുമ്പോൾ മനോരോഗികളാവുകയോ അത്യന്തം അസ്വസ്ഥരായി ആത്മഹത്യയിൽ അഭയം തേടുകയോ ചെയ്യുന്നു. ദൈവം ചത്തു പോയിരിക്കുന്നുവെന്ന് വിളിച്ചുപറഞ്ഞ നീത്ഷേ 1889 ജനുവരി 3 ന് പൂർണ ഭ്രാന്തനായി മാറി. പതിനൊന്ന് വർഷം മുഴു ഭ്രാന്തായി ജീവിച്ച അദ്ദേഹം 1900 ആഗസ്റ്റ് 25 നാണ് മരണമടഞ്ഞത്.

പ്രമുഖ നാസ്തികനും മാർക്സിയൻ ദർശനികനുമായ ആൽത്ത്യൂസർ പതിറ്റാണ്ടുകളോളം വിഷാദരോഗിയായി കഴിയുകയും അവസാനം മുഴുഭ്രാന്തനായിയി മാറുകയും ചെയ്തു. അങ്ങനെയാണ് 1980 നവംബർ 6 ന് അദ്ദേഹം ഭാര്യ ഹെലൻറെ കഴുത്ത് ഞെരിച്ചു കൊന്നത്. വേൾഡ് ഹെൽത്ത് ഓർഗനൈസേഷൻറെ മാനസികാരോഗ്യവകുപ്പ് മേധാവി ജോസ്മനോൻ ബെർട്ടലോട്ട് ആത്മഹത്യയുമായി ബന്ധപ്പെട്ട് നടത്തിയ പഠനത്തിൽ വിശ്വാസികളെ അപേക്ഷിച്ച് നാസ്തികരായ യുക്തിവാദികളുടെ ആത്മഹത്യാ നിരക്ക് വളരെ കൂടുതലാണ്. മുസ്ലിംകളിലെ ആത്മഹത്യാനിരക്ക് ഒരു ലക്ഷത്തിന് 0.1 ആണെങ്കിൽ നാസ്തികരിൽ 25.6 ആണ്.

Also read: സമാധാന നൊബേൽ പുരസ്കാരത്തിന് ട്രംപിനെ നാമനിർദേശം ചെയ്യുന്നത്..

വേൾഡ് ഹാപ്പിനെസ് റിപ്പോർട്ട് തയ്യാറാക്കാൻ വേണ്ട ഡാറ്റ നൽകിയ ഗ്യാലപ്പ് നടത്തിയ പഠനത്തിൽ മതാഭിമുഖ്യമുള്ള രാജ്യത്തെ ആത്മഹത്യയുടെ 12 ഇരട്ടിയാണ് 29 ശതമാനം ജനങ്ങൾ മാത്രം മാതാഭിമുഖ്യമുള്ളവർ താമസിക്കുന്ന ജപ്പാൻറെ ആത്മഹത്യാനിരക്ക്. ലോകത്തിലെ നാലിലൊന്ന് ആത്മഹത്യയും നടക്കുന്നത് നാസ്തികരുടെ നാടായ ചൈനയിലാണ്. ദൈവ വിശ്വാസമില്ലാത്തവർക്ക് മുൻതൂക്കമുള്ള ഫിൻലാൻറിൽ നടക്കുന്ന മരണങ്ങളിൽ മൂന്നിലൊന്നും ആത്മഹത്യയിലൂടെയാണ്. നോർവെയിൽ മാനസികാസ്വാസ്ഥ്യങ്ങൾക്ക് ചികിത്സ തേടുന്നവരുടെ വർദ്ധനവ് 40 ശതമാനമാണ്. മനുഷ്യപ്രകൃതം മതാഭിമുഖ്യമുള്ളതും യുക്തിവാദവുമായി പൊരുത്തപ്പെടാത്തതുമായതിനാലാണ് ഇങ്ങനെ സംഭവിക്കുന്നത്. പരിണാമത്തിലൂടെ മനുഷ്യമസ്തിഷ്കം രൂപപ്പെട്ടത് മത ചിന്തയ്ക്ക് പെട്ടെന്ന് അടിപ്പെടും വിധമാണെന്ന് കേരളത്തിലെ യുക്തിവാദി നേതാവ് രവിചന്ദ്രൻ തന്നെ തുറന്ന് സമ്മതിച്ചതാണല്ലോ.
(മാധ്യമം വാർഷികപ്പതിപ്പ് 2020. പുറം 152.)

Facebook Comments

ശൈഖ് മുഹമ്മദ് കാരകുന്ന്

കേരളത്തിൻറെ സാഹിത്യ, സാമൂഹ്യ, സാംസ്കാരിക മണ്ഡലങ്ങളിൽ നിറഞ്ഞുനിൽക്കുന്ന വ്യക്തിത്വത്തിൻറെ ഉടമയാണ് ശൈഖ് മുഹമ്മദ് കാരകുന്ന്. പരിശുദ്ധ ഖുർആൻ പരിഭാഷയും 13 വിവർത്തന കൃതികളും ഉൾപ്പെടെ 84 ഗ്രന്ഥങ്ങളുടെ കർത്താവാണ്. പരിഭാഷക്കും രാഷ്ട്രാന്തരീയ പാരസ്പര്യത്തിനുമുള്ള 2019ലെ ഖത്തർ ശൈഖ് ഹമദ് അന്താരാഷ്ട്ര അവാർഡ് ജേതാവാണ്. സാമൂഹ്യ പ്രവർത്തനത്തിനുള്ള കെ. കരുണാകരൻ അവാർഡ് നേടിയ ശൈഖ് മുഹമ്മദിൻറെ അഞ്ച് ഗ്രന്ഥങ്ങൾക്ക് അവാർഡുകൾ ലഭിച്ചിട്ടുണ്ട്. അഞ്ച് ഗ്രന്ഥങ്ങൾ ഇംഗ്ലീഷിലേക്കും പത്തെണ്ണം കന്നഡയിലേക്കും മൂന്നെണ്ണം തമിഴിലേക്കും ഒന്ന് മറാഠിയിലേക്കും വിവർത്തനം ചെയ്യപ്പെട്ടിട്ടുണ്ട്. കൂടാതെ നൂറുക്കണക്ക് ലേഖനങ്ങൾ ആനുകാലികങ്ങളിൽ പ്രസിദ്ധീകരിക്കപ്പെട്ടിട്ടുണ്ട്. 33 വർഷം ഐ. പി. എച്ച്. ഡയറക്ടറും ദീർഘകാലം പ്രബോധനം വാരിക ചീഫ് എഡിറ്ററുമായിരുന്ന ശൈഖ് മുഹമ്മദ് ഇപ്പോൾ ഡയലോഗ് സെൻറർ കേരളയുടെ ഡയറക്ടറും കേരള മുസ്ലിം ഹെറിറ്റേജ് ഫൗണ്ടേഷൻ ചെയർമാനും നിരവധി മത, സാമൂഹ്യ,സാംസ്കാരിക സംവിധാനങ്ങളുടെ ഭാരവാഹിയുമാണ്. ദോഹ ഇന്റർ നാഷണൽ കോൺഫറൻസ്, ദുബായ് ഇൻറർനാഷണൽ ഖുർആൻ കോൺഫ്രൻസ്, ഐ. ഐ. എഫ്. എസ്.ഒ. ഏഷ്യൻ റീജണൽ ക്യാമ്പ് തുടങ്ങിയവയിൽ സംബന്ധിച്ചിട്ടുണ്ട്. മതാന്തര സംവാദ വേദികളിലും സാംസ്കാരിക പരിപാടികളിലും സജീവ സാന്നിധ്യമായ ശൈഖ് മുഹമ്മദ് കാരകുന്ന് അറിയപ്പെടുന്ന പ്രഭാഷകനുമാണ്. 1950 ജൂലൈ 15 മഞ്ചേരിക്കടുത്ത കാരകുന്നിലെ പുലത്ത് ഗ്രാമത്തില്‍ ജനിച്ചു. പിതാവ് പുലത്ത് മുഹമ്മദ് ഹാജി . മാതാവ് ആമിന. പുലത്ത് ഗവണ്‍മെന്റ് ലോവര്‍ പ്രൈമറി സ്‌കൂള്‍, കാരകുന്ന് അപ്പര്‍ പ്രൈമറി സ്‌കൂള്‍, മഞ്ചേരി ഗവണ്‍മെന്റ് ഹൈസ്‌കൂള്‍, ഫറോക്ക് റൗദത്തുല്‍ ഉലൂം അറബിക് കോളേജ്, കോഴിക്കോട് എല്‍.ടി.ടി. സെന്റര്‍ എന്നിവിടങ്ങളില്‍ വിദ്യാഭ്യാസം. മൊറയൂര്‍ വി.എച്ച്.എം.ഹൈസ്‌കൂള്‍, എടവണ്ണ ഇസ്ലാഹിയാ ഓറിയന്റല്‍ ഹൈസ്‌കൂള്‍ എന്നിവിടങ്ങളില്‍ അദ്ധ്യാപകനായി ജോലി ചെയ്തു. ഇപ്പോള്‍ ജമാഅത്തെ ഇസ്ലാമി കേന്ദ്ര പ്രതിനിധി സഭാംഗം, കേരള സംസ്ഥാന കൂടിയാലോചനാ സമിതി അംഗം ,എന്നീ ചുമതലകള്‍ക്കൊപ്പം സംസ്ഥാന സെക്രട്ടറി കൂടിയാണ്.സുഊദി അറേബ്യ , യു.എ.ഇ ,ഒമാന്‍ , കുവൈത്ത്, ഖത്തര്‍ , ബഹ്‌റൈന്‍ , സിംഗപ്പൂര്‍, ശ്രീലങ്ക, മലേഷ്യ എന്നീ നാളുകള്‍ സന്ദര്‍ശിച്ചു. ആമിന ഉമ്മു അയ്മനാണ് കുടുംബിനി. അനീസ് മുഹമ്മദ് , ഡോക്ടര്‍ അലീഫ് മുഹമ്മദ് , ഡോക്ടര്‍ ബാസിമ , അയമന്‍ മുഹമ്മദ് എന്നിവര്‍ മക്കളും ഡോക്ടര്‍ അബ്ദുറഹമാന്‍ ദാനി, ഷമിയ്യത് , ആയിഷ നസീബ, ഇബ്തിസാം എന്നിവര്‍ ജാമാതാക്കളുമാണ്.

Related Articles

Back to top button

Adblock Detected

Please consider supporting us by disabling your ad blocker