നിത്യജീവിതത്തിൽ ഇസ്ലാമിക നിഷ്ഠ പുലർത്തുകയും മൂല്യങ്ങൾ പിന്തുടരുകയും പിന്നീട് അതുപേക്ഷിക്കുകയും ചെയ്ത ചില ചെറുപ്പക്കാരുമായി ബന്ധപ്പെടാൻ അവസരം ലഭിച്ചു. അതിലേറെ പേരെയും അത്തരമൊരവസ്ഥയിലെത്തിച്ചത് അവരുടെ പ്രണയബന്ധമാണ്. മതമില്ലാത്തവരെയോ മറ്റു മതക്കാരെയോ ജീവിത പങ്കാളികളാക്കാൻ ആഗ്രഹിക്കുന്നവർ അവരെ പ്രീതിപ്പെടുത്താനും അതിന് ആദർശത്തിൻറെ പരിവേഷം നൽകാനുമാണ് പലപ്പോഴും ഇസ്ലാം ഉപേക്ഷിക്കാറുള്ളത്.
ഇത് ഇവിടത്തെ മാത്രം സ്ഥിതിയല്ല. അറബ് നാടുകളിലെ പല ഭരണാധികാരികളെയും വഴി പിഴപ്പിച്ചതും ഇസ്ലാമിക, മുസ്ലിം വിരുദ്ധ നിലപാടുകൾക്ക് പ്രേരിപ്പിച്ചതും അവരുടെ ജീവിതപങ്കാളികളായിരുന്നു.
Also read: കുട്ടികളുടെ ശിക്ഷണത്തിന് പത്ത് കാര്യങ്ങള്‍
ഇത്തരം നിരവധി സംഭവങ്ങളിലൊന്ന് റാശിദുൽ ഗന്നൂശി തൻറെ ആത്മകഥയിൽ വിശദീകരിച്ചിട്ടുണ്ട്. തുനീഷ്യൻ ഭരണാധികാരി ബുർഖീബ അവിടെ ദത്ത് സമ്പ്രദായം നിയമാനുസൃതമാക്കി. വിവാഹ ബാഹ്യ ദാമ്പത്യ ബന്ധങ്ങൾക്ക് അനുമതി നൽകി. ഉഭയസമ്മതപ്രകാരമാണെങ്കിൽ സ്വതന്ത്ര ലൈംഗികബന്ധങ്ങൾ കുറ്റകൃത്യമല്ലാതാക്കി. വിവാഹമോചനത്തിന് താങ്ങാനാവാത്ത പിഴചുമത്തി. വിവാഹത്തോട് തന്നെ വിരക്തിയും ഭയവുമുണ്ടാക്കും വിധം വിവാഹമോചന നിയമങ്ങൾ അതസാധ്യമാക്കും വിധം കർക്കശമാക്കി. ഇങ്ങനെ ഇസ്ലാമിക ശരീരത്തിനെ മാറ്റി മറിച്ചു. ഇവ്വിധം ബുർഖീബ പാശ്ചാത്യ സംസ്കാരത്തിനും കത്തോലിക്കൻ സമീപനങ്ങൾക്കും അനുയോജ്യമാം വിധം നിയമ പരിഷ്കരണം വരുത്തിയത് ഫ്രഞ്ചുകാരി ഭാര്യ മാതീഡെ ലോറിയൻറെ(Mathiede Lorrian) സ്വാധീന ഫലമായായിരുന്നുവെന്ന് കരുതപ്പെടുന്നു.
വിവാഹമോചനത്തെ ശക്തമായി എതിർത്തിരുന്ന ബുർഖീബ അതുതന്നെ ചെയ്തു. ഒരിക്കലല്ല; രണ്ടുതവണ.സോർബോൺ സർവകലാശാലയിൽ വെച്ച് പരിചയപ്പെട്ട് വിവാഹം കഴിച്ച ഫ്രഞ്ച് വനിത മാതീഡെ ലോറിയനെ 1961 ൽ വിവാഹമോചനം ചെയ്തു. പിന്നീട് 1962 ൽ വിവാഹം ചെയ്ത വസീലയെ വാർദ്ധക്യകാലത്ത് മൊഴിചൊല്ലി. നമ്മുടെ നാട്ടിലെ ശരീഅത് വിരുദ്ധരും വിമർശകരും ചെയ്യുന്ന പോലെത്തന്നെ.
Also read: സ്ത്രീകളോടുള്ള ആദരവ്
ബുർഖീബയെപ്പോലെത്തന്നെയാണ് ഇസ്ലാമുപേക്ഷിക്കുന്ന നമ്മുടെ നാട്ടിലെ ചെറുപ്പക്കാരിൽ ചിലരെങ്കിലുമെന്ന കാര്യം തിരിച്ചറിയുന്നത് ഉപകാരപ്രദമായിരിക്കും.
