Vazhivilakk

പ്രാർത്ഥനയും കോവിഡ് പ്രതിരോധവും

കേരളത്തിലെ ഏറ്റവും ശ്രദ്ധേയനായ സാംസ്കാരിക പ്രവർത്തകരിലൊരാളാണ് കെ.ഇ .എൻ. താൻ ഒരു ദൈവവിശ്വാസിയല്ലെന്ന് തുറന്നു പറയാൻ ഒട്ടും മടിയില്ലാത്ത ഇടതുപക്ഷ ഇടപെടലിൻറെ ശക്തനായ വക്താവ്.

അദ്ദേഹം പറയുന്നു:”അന്ധനായ എൻറെ ഒരു വിദ്യാർത്ഥിയോട് സംസാരിച്ചപ്പോൾ, കടുത്ത നിരാശാബോധം അവനെ പിടികൂടിയതായി എനിക്ക് മനസ്സിലായി. മുസ്ലിമായ അവൻ പള്ളിയിൽ പോകാറില്ല എന്ന് പറഞ്ഞു.ഞാനവനോട് പള്ളിയിൽ പോയി കൃത്യമായി നമസ്കരിക്കണമെന്നാണ് ഉപദേശിച്ചത്. സ്വയം ബോധത്തിൻറെ ആഴത്തിൽ നിന്നുള്ള വിശ്വാസം ജീവിത നിരാശയിൽ പെട്ടവർക്ക് വലിയ ആശ്വാസം പകരും. അർത്ഥവത്തും ആത്മാർത്ഥവുമായിരിക്കണം അതെന്ന് മാത്രം. അത്തരത്തിൽ വ്യക്തിയെ സ്വാധീനിക്കാൻ വിശ്വാസത്തിന് സാധിക്കും. ഇത് തന്നെയായിരുന്നു മതത്തോടുള്ള മാർക്സിൻറെ സമീപനം. യുക്തിവാദിയായിരുന്ന ഭഗത് സിംഗ് തൂക്കുമരത്തിലെത്തുമ്പോൾ പറയുന്നുണ്ട് ;താനൊരു വിശ്വാസിയായിരുന്നുവെങ്കിൽ എത്ര നന്നായിരുന്നുവെന്ന്.”(ഉദ്ധരണം: ആത്മഹത്യ, ഭൗതികത, ഇസ്ലാം. പുറം: 45)

കോവിഡുൾപ്പെടെ ഏത് രോഗത്തെയും പ്രതിരോധിക്കുന്നതിലും രോഗശമനത്തിലും മനസ്സമാധാനത്തിനും ഇഛാ ശക്തിക്കുമുള്ള പങ്ക് അംഗീകരിക്കാത്ത ആരുമുണ്ടാവില്ല. മനസ്സമാധാനവും മനക്കരുത്തും നൽകുന്നതിൽ പ്രാർത്ഥനയുടെ പങ്കും സ്വാധീനവും ഇത്തിരിയെങ്കിലും സത്യസന്ധതയുള്ള മത നിഷേധികൾ പോലും അംഗീകരിക്കുന്നതാണ്.

താൻ കേൾക്കുന്നത് പ്രാർത്ഥനയാണെന്ന ധാരണ പോലും മത വിശ്വാസമില്ലാത്തവരെക്കൂടി എത്രമേൽ സ്വാധീനിക്കുമെന്ന്, തീവ്ര ഇടതുപക്ഷ പ്രവർത്തകൻ പൊന്ന്യത്തെ രാമകൃഷ്ണൻറെ ആത്മഹത്യയെക്കുറിച്ച് എഴുതവേ അത് നടന്നതിൻറെ പിറ്റേന്നാളത്തെ അനുഭവം മൃത ശരീരത്തിന് കാവൽ നിന്ന എ.സോമൻറെ വാക്കുകൾ വ്യക്തമാക്കുന്നു:”അല്ലാഹു അക്ബർ…
ഞാനുണർന്നു; അടുത്ത പള്ളിയിലെ ബാങ്ക് വിളി കേട്ടു കൊണ്ട്. ആ സ്വരത്തിലെ അഭൗമധാര പൊടുന്നനെ എന്നെ സ്വസ്ഥ ചിത്തനാക്കി. ആത്മഹത്യക്കും അതിജീവിതത്തിനുമിടയിൽ ആ ദൈവസ്തുതിയിടങ്ങിയ തരളത പിറന്നതും പിറക്കാനിരിക്കുന്നതുമായ മഹാ കാലത്തിൻറെ ഓർമ്മകൾ ചുരത്തി എന്നിൽ. പിന്നീട് ഏറെക്കാലം എന്നിൽ ഘനീഭൂതമായി കിടന്നു ആ ബാങ്കുവിളി. പല ആപദ്ഘട്ടങ്ങളിലും സ്വൈരം നശിക്കുമ്പോൾ എൻറെ ഉപബോധം എനിക്കയക്കാറുള്ള സന്ദേശം.”(ഉദ്ധരണം: അതേ പുസ്തകം. പുറം: 47)

കോവിഡ് പ്രതിരോധിക്കാനുള്ള ഭൗതിക സംവിധാനത്തോടൊപ്പം ആത്മീയതക്കുള്ള പങ്ക് അംഗീകരിച്ച് നിയമങ്ങൾ പാലിച്ച് കൊണ്ടുതന്നെ പ്രാർത്ഥനകളും കീർത്തനങ്ങളും നടത്താൻ വിശ്വാസികൾക്ക് പരമാവധി സൗകര്യം ചെയ്തു കൊടുക്കുകയാണ് ഉത്തരവാദപ്പെട്ടവർ ചെയ്യേണ്ടത്.

ശൈഖ് മുഹമ്മദ് കാരകുന്ന്

കേരളത്തിൻറെ സാഹിത്യ, സാമൂഹ്യ, സാംസ്കാരിക മണ്ഡലങ്ങളിൽ നിറഞ്ഞുനിൽക്കുന്ന വ്യക്തിത്വത്തിൻറെ ഉടമയാണ് ശൈഖ് മുഹമ്മദ് കാരകുന്ന്. പരിശുദ്ധ ഖുർആൻ പരിഭാഷയും 13 വിവർത്തന കൃതികളുമുൾപ്പെടെ തൊണ്ണൂറിലേറെ ഗ്രന്ഥങ്ങളുടെ കർത്താവാണ്. പരിഭാഷക്കും രാഷ്ട്രാന്തരീയ പാരസ്പര്യത്തിനുമുള്ള 2019ലെ ഖത്തർ ശൈഖ് ഹമദ് അന്താരാഷ്ട്ര അവാർഡ് ജേതാവാണ്. സാമൂഹ്യ പ്രവർത്തനത്തിനുള്ള കെ. കരുണാകരൻ അവാർഡ് നേടിയ ശൈഖ് മുഹമ്മദിൻറെ അഞ്ച് ഗ്രന്ഥങ്ങൾക്ക് അവാർഡുകൾ ലഭിച്ചിട്ടുണ്ട്. അഞ്ച് ഗ്രന്ഥങ്ങൾ ഇംഗ്ലീഷിലേക്കും പത്തെണ്ണം കന്നഡയിലേക്കും മൂന്നെണ്ണം തമിഴിലേക്കും ഒന്ന് മറാഠിയിലേക്കും വിവർത്തനം ചെയ്യപ്പെട്ടിട്ടുണ്ട്. കൂടാതെ നൂറുക്കണക്ക് ലേഖനങ്ങൾ ആനുകാലികങ്ങളിൽ പ്രസിദ്ധീകരിക്കപ്പെട്ടിട്ടുണ്ട്. 33 വർഷം ഐ. പി. എച്ച്. ഡയറക്ടറും ദീർഘകാലം പ്രബോധനം വാരിക ചീഫ് എഡിറ്ററുമായിരുന്ന ശൈഖ് മുഹമ്മദ് ഇപ്പോൾ ഡയലോഗ് സെൻറർ കേരളയുടെ ഡയറക്ടറും കേരള മുസ്ലിം ഹെറിറ്റേജ് ഫൗണ്ടേഷൻ ചെയർമാനും നിരവധി മത, സാമൂഹ്യ,സാംസ്കാരിക സംവിധാനങ്ങളുടെ ഭാരവാഹിയുമാണ്. ദോഹ ഇന്റർ നാഷണൽ കോൺഫറൻസ്, ദുബായ് ഇൻറർനാഷണൽ ഖുർആൻ കോൺഫ്രൻസ്, ഐ. ഐ. എഫ്. എസ്.ഒ. ഏഷ്യൻ റീജണൽ ക്യാമ്പ് തുടങ്ങിയവയിൽ സംബന്ധിച്ചിട്ടുണ്ട്. മതാന്തര സംവാദ വേദികളിലും സാംസ്കാരിക പരിപാടികളിലും സജീവ സാന്നിധ്യമായ ശൈഖ് മുഹമ്മദ് കാരകുന്ന് അറിയപ്പെടുന്ന പ്രഭാഷകനുമാണ്. 1950 ജൂലൈ 15 മഞ്ചേരിക്കടുത്ത കാരകുന്നിലെ പുലത്ത് ഗ്രാമത്തിൽ ജനിച്ചു. പിതാവ് പുലത്ത് മുഹമ്മദ് ഹാജി . മാതാവ് ആമിന. പുലത്ത് ഗവൺമെന്റ് ലോവർ പ്രൈമറി സ്‌കൂൾ, കാരകുന്ന് അപ്പർ പ്രൈമറി സ്‌കൂൾ, മഞ്ചേരി ഗവൺമെന്റ് ഹൈസ്‌കൂൾ, ഫറോക്ക് റൗദത്തുൽ ഉലൂം അറബിക് കോളേജ്, കോഴിക്കോട് എൽ.ടി.ടി. സെന്റർ എന്നിവിടങ്ങളിൽ വിദ്യാഭ്യാസം. മൊറയൂർ വി.എച്ച്.എം.ഹൈസ്‌കൂൾ, എടവണ്ണ ഇസ്ലാഹിയാ ഓറിയന്റൽ ഹൈസ്‌കൂൾ എന്നിവിടങ്ങളിൽ അദ്ധ്യാപകനായി ജോലി ചെയ്തു. ഇപ്പോൾ ജമാഅത്തെ ഇസ്ലാമി കേന്ദ്ര പ്രതിനിധി സഭാംഗം, കേരള സംസ്ഥാന കൂടിയാലോചനാ സമിതി അംഗം ,എന്നീ ചുമതലകൾക്കൊപ്പം സംസ്ഥാന സെക്രട്ടറി കൂടിയാണ്.സുഊദി അറേബ്യ , യു.എ.ഇ ,ഒമാൻ , കുവൈത്ത്, ഖത്തർ , ബഹ്‌റൈൻ , സിംഗപ്പൂർ, ശ്രീലങ്ക, മലേഷ്യ എന്നീ നാടുകൾ സന്ദർശിച്ചു. ആമിന ഉമ്മു അയ്മനാണ് കുടുംബിനി. അനീസ് മുഹമ്മദ് , ഡോക്ടർ അലീഫ് മുഹമ്മദ് , ഡോക്ടർ ബാസിമ , അയമൻ മുഹമ്മദ് എന്നിവർ മക്കളും ഡോക്ടർ അബ്ദുറഹമാൻ ദാനി, ഷമിയ്യത് , ആയിഷ നസീബ, ഇബ്തിസാം എന്നിവർ ജാമാതാക്കളുമാണ്.

View Other Articles