എന്നാല്‍ ആറാം നൂറ്റാണ്ടില്‍ തന്നെ ഈ സാമൂഹിക വിപ്ലവത്തിന് നേതൃത്വം നല്‍കാന്‍ ഇസ്‌ലാമിന് സാധിച്ചു. ചരിത്രത്തിലെ ഇരുണ്ട യുഗത്തില്‍ മനുഷ്യന്‍ മനുഷ്യനെ കൊലപ്പെടുത്തുകയും അവന്റെ അവകാശങ്ങള്‍ അപഹരിക്കുകയും ചെയ്തിരുന്നു. സാമൂഹികമായ അവന്റെ പദവിയെ അവര്‍ അംഗീകരിച്ചരുന്നില്ല. ഈ പരിതസ്ഥിതിയിലാണ് മനുഷ്യര്‍ സമന്മാരാണെന്നും ഏകോദരസഹോദരന്മാരാണെന്നുമുള്ള വിപ്ലവകരമായ ആശയം ലോകത്തിന് ഇസ്‌ലാം സമര്‍പ്പിച്ചത. ഇവിടെ പിറന്നുവീഴുന്ന ഓരോ മനുഷ്യനും അഞ്ച് മൗലികാവകാശങ്ങള്‍ പൂര്‍ത്തീകരിക്കാന് നാം ബാധ്യസ്ഥരാണെന്നും അത് ലോകത്തെ പഠിപ്പിച്ചു. ജീവിക്കാനുള്ള അവകാശം, ഏത് മതവും ആദര്‍ശവും സ്വീകരിക്കാനുള്ള അവകാശം, വിദ്യാഭ്യാസത്തിനുള്ള അവകാശം, ജീവിതായോധനം തേടാനുള്ള അവകാശം, അന്തസ്സും അഭിമാനവും സംരക്ഷിക്കാനുള്ള അവകാശം എന്നിവയാണത്. ഇസ്‌ലാമിക ശരീഅത്തിന്റെ അടിസ്ഥാനമാണിത്. ഇത് സാക്ഷാല്‍കരിക്കാന്‍ വേണ്ടി നിലകൊള്ളുകയും സംരക്ഷിക്കാന്‍ വേണ്ടി യുദ്ധപോരാട്ടങ്ങളില്‍ ഏര്‍പ്പെടുകയും ചെയ്തു.
രാഷ്ട്രത്തിലെ എല്ലാ ജനവിഭാഗങ്ങള്‍ക്കും ഐശര്യപൂര്‍ണമായ ജീവിതം ഒരുക്കേണ്ടത് ഭരണകൂടത്തിന്റെ ബാധ്യതയാണ്. അത് ലഭിക്കുക എന്നത് അശരണരുടെയും നിരാലംബരുടെയും അവകാശത്തില്‍ പെട്ടതാണ്. ഇസ്‌ലാമിലെ സകാത്ത് ധനികന്റെ അവകാശമല്ല, മറിച്ച് ദരിദ്രന്റെ അവകാശമാണ്. ഒരു ഉദ്യോഗസ്ഥനോ സൈന്യാധിപനോ തങ്ങളുടെ ശമ്പളത്തിന് എത്രത്തോളം അവകാശമുണ്ട് അതുപോലെ ഇത്തരം അശരണരായ ജനവിഭാഗങ്ങള്‍ക്കും രാഷ്ട്രത്തിന്റെ സമ്പത്തില്‍ അവകാശമുണ്ട്.
സാമൂഹിക സേവനരംഗത്ത് ഇടപെടേണ്ടതിന്റെ കൃത്യമായ മാര്‍ഗരേഖ പതിനാല് നൂറ്റാണ്ടുകള്‍ക്ക് മുമ്പേ ഇസ്‌ലാം അവതരിപ്പിച്ചു. ഇസ്‌ലാമിക സമൂഹത്തിന്റെ പ്രശോഭിത കാലയളവില്‍ തുല്യതയില്ലാത്ത ജീവകാരുണ്യ പ്രവര്‍ത്തനങ്ങള്‍ക്കാണ് ലോകം സാക്ഷിയായത്. വഖഫ് സംരംഭങ്ങള്‍, വിദ്യാഭ്യാസ സ്ഥാപനങ്ങള്‍. ആതുരാലയങ്ങള്‍. അഭയകേന്ദ്രങ്ങള്‍ തുടങ്ങിയവയെല്ലാം അന്ന് പടര്‍ന്നു പന്തലിച്ചു. എന്നാല്‍ സാമൂഹികമായ പിന്നോക്കം കാരണം ഇത്തരം മേഖലകളില്‍ ഇന്ന് നാം വലിയ പ്രതിസന്ധികള്‍ അഭിമുഖീകരിക്കുന്നു. രാഷ്ട്രത്തിന്റെ ഭരണഘടനയിലും നിയമങ്ങളിലും ഇടംപിടിക്കുന്നതിന് മുമ്പ് ഈ മാനുഷിക വികാരം നമ്മുടെ മനസ്സുകളില്‍ രൂഢമൂലമാകേണ്ടതുണ്ട്. സമൂഹത്തിന് നമ്മെ അനുഭവിക്കാന്‍ കഴിയുന്ന രീതിയില്‍ നിര്‍മാണാത്മകമായ ജീവകാരുണ്യപ്രവര്‍ത്തനങ്ങളില്‍ സജീവമാകാന്‍ നമുക്ക് സാധിക്കേണ്ടതുണ്ട്. ഖുര്‍ആന്‍ ആഹ്വാനം ചെയ്യുന്നു. ‘വിശ്വസിച്ചവരേ, നിങ്ങളെ ജീവസ്സുറ്റവരാക്കുന്ന ഒന്നിലേക്ക് വിളിക്കുമ്പോള്‍ അല്ലാഹുവിന്നും അവന്റെ ദൂതന്നും നിങ്ങള്‍ ഉത്തരം നല്‍കുക. മനുഷ്യന്നും അവന്റെ മനസ്സിന്നും ഇടയില്‍ അല്ലാഹു ഉണ്ട്. അവസാനം അവന്റെ അടുത്തേക്കാണ് നിങ്ങളെ ഒരുമിച്ചുകൂട്ടുക.’ (അല്‍ അന്‍ഫാല്‍: 24)
