ലോകമൊട്ടാകെ ഹരിതവല്ക്കരണവും പരിസ്ഥിതി സംരക്ഷണവുമൊക്കെ സജീവമായി ചര്ച്ച ചെയ്തുവരുന്നു. അന്ത്യനാളിന്റെ കാഹളം വിളി കേട്ടാലും കൈയിലുള്ള ഫലവൃക്ഷ തൈ നടണമെന്നാണ് പ്രവാചകന്റെ കല്പന. ഒരാള് നട്ടുവളര്ത്തിയ മരത്തണലില് വഴിയാത്രക്കാര് വിശ്രമിച്ചാലും, അതിന്മേല് കായ്ച്ച പഴങ്ങള് പക്ഷി മൃഗാദികള് ഭക്ഷിച്ചാലും മരണാനന്തരവും പ്രതിഫലം കിട്ടുമെന്നും നബിതിരുമേനി പഠിപ്പിച്ചിരിക്കുന്നു. ആര്ത്ത് പെയ്യുന്ന മഴയും ഫലഭൂയിഷ്ഠമായ മണ്ണുമുള്ള മലയാള നാട്ടില് മാങ്ങയും, ചക്കയും, സപ്പോട്ടയും, കദളിപ്പഴവും, പപ്പായയും ജൈവവളം ചേര്ത്ത് കൃഷി ചെയ്യാന് മുന്കൈ എടുക്കേണ്ടത് മുസ്ലിംകളല്ലേ?
ആകാശത്തില് നിന്ന് മഴവര്ഷിപ്പിച്ച മഹാ അനുഗ്രഹത്തെ പറ്റി അല്ലാഹു ഖുര്ആനില് അനേകം തവണ എടുത്തോതിയിട്ടുണ്ട്. ആ മഴവെള്ളം പാഴായിപ്പോകാതെ സൂക്ഷിച്ച് വെച്ച് ശ്രദ്ധിച്ചു വിനിയോഗിക്കേണ്ടതിനെ പറ്റി സാധാരണ ബോധവല്ക്കരിക്കേണ്ടത് വിവരമുള്ളവരുടെ ബാധ്യതയാണ്.
പച്ചപിടിച്ചു നില്ക്കുന്ന പറമ്പുകളും ഗ്രന്ഥശാലയില് പോയി വായിക്കുകയും ചര്ച്ച നടത്തുകയും സംവാദസായാഹ്നങ്ങള് നടത്തുകയും ചെയ്യുന്ന യുവജനങ്ങളും അതത് കാലത്തെ ഏറെ വളര്ച്ച പ്രാപിച്ച കോഴ്സുകളില് ചേര്ന്ന് അധ്വാനിച്ചു പഠിക്കുന്ന വിദ്യാര്ഥികളും ഉള്ള മഹല്ലുകളെ വളര്ത്തിക്കൊണ്ടുവരാനാണ് ശ്രമങ്ങള് നടക്കേണ്ടത്. ഇത്തരം ഒരു മാതൃകാ സമൂഹം സജീവമായി നിലകൊള്ളുമ്പോഴാണ് ഇതര ജനവിഭാഗങ്ങള്ക്ക് അവരുടെ ആശയാദര്ശങ്ങളുടെ പ്രസക്തി ബോധ്യപ്പെടുക.