പാപങ്ങളെ ഇപ്രകാരം നിസാരമാക്കി കണക്കാക്കുന്നത് വലിയ അപകടത്തിലേക്കാണ് മനുഷ്യനെ നയിക്കുക. ചെറിയ ചെറിയ പാപങ്ങളില് നിരന്തരം ഏര്പ്പെടുകയും അതില് ഉറച്ചു നില്ക്കുകയും ചെയ്യുന്നവന് അവസാനം കൊടിയ പാപത്തിലേക്ക് എത്തിച്ചേരുന്നു. പ്രവാചകന് പറയുന്നു : ‘തെറ്റില് അടിയുറച്ചു നില്ക്കുന്നവര്ക്ക് നാശം, അവര് അറിഞ്ഞുകൊണ്ടു തന്നെ തെറ്റില് ഉറച്ചു നില്ക്കുന്നവരാണ്’ (അഹ്മദ്). ഇബ്നു മുബാറക്ക് പറയുന്നു : ‘പാപങ്ങള് ഹൃദയങ്ങളെ മരിപ്പിക്കുകയും നിന്ദ്യത പകരം നല്കുകയും ചെയ്യും. എന്നാല് പാപങ്ങളില് നിന്നും അകന്നു നില്ക്കല് ഹൃദയങ്ങളെ കൂടുതല് ജീവസുറ്റതാക്കുന്നു’. അല്ലാഹു വിശ്വാസികളെ അവര് തെറ്റുകളില് ഉറച്ചു നില്ക്കുന്നവരല്ലെന്നാണ് വിശേഷിപ്പിച്ചത്. ‘അവരോ, ഒരു നീചകൃത്യം ചെയ്യാനോ അധര്മത്തിലേര്പ്പെട്ട് തങ്ങളെത്തന്നെ അക്രമിക്കാനോ ഇടയായാല് ഉടനെ അല്ലാഹുവിനെ ഓര്ത്ത് പാപമോചനം തേടുന്നവരാകുന്നു. എന്തെന്നാല്, പാപമോചനം നല്കുന്നവന് അല്ലാഹുവല്ലാതാരുണ്ട്? അവര്, അറിഞ്ഞുകൊണ്ട് ദുഷ്ചെയ്തികളില് ഉറച്ചുനില്ക്കുന്നതല്ല’ (ആലു ഇംറാന് 135). പാപങ്ങള് ചെയ്തു കൂട്ടിവന്റെ കുറ്റങ്ങള് പൊറുത്തു കൊടുക്കാന് സദാ സന്നദ്ധനായ നാഥനോട്, ചെയ്ത പാപങ്ങളില് പശ്ചാതപിക്കുകയും ചെയ്തു പോയതില് ഖേദിച്ച് അവനിലേക്ക് മടങ്ങുകയും ചെയ്യുക. പശ്ചാതാപങ്ങള് സ്വീകരിക്കാന് അവനല്ലാതെ മറ്റാരുമില്ലല്ലോ. പ്രവാചകന് പോലും ഒരു ദിവസം എഴുപതിലേറെ തവണ അല്ലാഹുവോട് പശ്ചാതാപിച്ച് തെറ്റുകള് പൊറുത്തു തരാന് ആവശ്യപ്പെടാറുണ്ടായിരുന്നു. നിരന്തരം തെറ്റുകള് ആവര്ത്തിക്കുകയും പാപങ്ങള് ചെയ്തുകൂട്ടുകയും ചെയ്യുന്ന നമ്മള് എത്ര തവണ അല്ലാഹുവിലേക്ക് പശ്ചാതപിച്ച് മടങ്ങേണ്ടി വരും!
വിവ : ജലീസ് കോഡൂര്