അങ്കാറ: അമേരിക്കൻ പൗരന്മാർക്കും, ഇതര രാഷട്രങ്ങളിലെ പൗരന്മാർക്കുമെതിരായി തുർക്കിയിൽ ഭീകരാക്രമണം നടക്കാനും, അവരെ തട്ടികൊണ്ടുപോകാനും സാധ്യതയുണ്ടെന്ന വിശ്വസനീയമായ വിവരം ലഭിച്ചതായി തുർക്കിയിലെ അമേരിക്കൻ എംബസി. തുർക്കിയിലെ വലിയ നഗരമായ ഇസ്താംബൂളിലെ യു.എസ് കോൺസുലേറ്റ് ജനറലുൾപ്പടെ, മറ്റ് സ്ഥലങ്ങളും ഭീഷണിയിലാണെന്ന് തുർക്കിയിലെ യു.എസ് എംബസി വെള്ളിയാഴ്ച വെബ്സൈറ്റിൽ പ്രസിദ്ധീകരിച്ച പ്രസ്താവനയിൽ വ്യക്തമാക്കി.
വലിയ ഓഫീസ് കെട്ടിടങ്ങൾ, ഷോപ്പിങ് മാളുകൾ എന്നിവയുൾപ്പടെ അമേരിക്കക്കാരും വിദേശികളും കൂടിചേരുന്ന സ്ഥലങ്ങളിൽ കൂടുതൽ ജാഗ്രത യു.എസ് പൗരന്മാർ പാലിക്കണമെന്ന് പ്രസ്താവനയിൽ പറയുന്നു. യു.എസ് എംബസി തുർക്കിയിൽ ഒന്നിലധികം തവണ ആക്രമിക്കപ്പെട്ടിട്ടുണ്ട്.