ദോഹ: ഇറാൻ ആണവ കരാറിലേക്ക് മടങ്ങാനുളള ശ്രമത്തിന്റെ ഭാഗമായി നടക്കുന്ന നിർണായകമായ നാലാം ഘട്ട പരോക്ഷ ചർച്ചയിൽ ക്രിയാത്മകമായി ഇടപെടാൻ യു.എസിനോടും ഇറാനോടും ആവശ്യപ്പെട്ട് ഖത്തർ. ആണവ കരാർ പുനരുജ്ജീവിപ്പിക്കുന്നതിന് യൂറോപ്യൻ, റഷ്യൻ, ചൈനീസ് പ്രതിനിധികൾക്കൊപ്പം വിയന്നയിൽ വെള്ളിയാഴ്ച നടക്കുന്ന ചർച്ചയിൽ യു.എസ്-ഇറാൻ നയതന്ത്രജ്ഞർ പ്രശ്നം സങ്കീർണമാക്കരുതെന്ന് ഖത്തർ വിദേശകാര്യ മന്ത്രി ശൈഖ് മുഹമ്മദ് ബിൻ അബ്ദുറഹ്മാൻ അൽഥാനി അവശ്യപ്പെട്ടു.
ഞങ്ങൾക്ക് യു.എസുമായി ശക്തവും നയതന്ത്രപരവുമായ ബന്ധമുണ്ട്. ഇറാനുമായി നല്ല ബന്ധമാണുള്ളത്. സങ്കീർണതകൾ വർധിപ്പിക്കാൻ ഞങ്ങൾ ആഗ്രഹിക്കുന്നില്ല. ഇത് ഖത്തറിനെയും മേഖലിയെയും ദോഷകരമായി ബാധിക്കും. യു.എസിനോടും ഇറാനോടും ക്രിയാത്മക ചർച്ചയിൽ ഏർപ്പെടാൻ നിരന്തരമായി ആവശ്യപ്പെടുന്നു -വിദേശകാര്യ മന്ത്രി അൽഥാനി അൽജസീറക്ക് നൽകിയ അഭിമുഖത്തിൽ വ്യാഴാഴ്ച പറഞ്ഞു.
