ജറൂസലേം: മസ്ജിദുല്‍ അഖ്‌സയുടെ സംരക്ഷണത്തിന് ജനകീയ പടയൊരുക്കത്തിന് ആഹ്വാനവുമായി ഫലസ്തീന്‍ പ്രതിരോധ സംഘടനയായ ഇസ്ലാമിക് ജിഹാദ്. ഇസ്രായേലി ജൂത കുടിയേറ്റക്കാരില്‍ നിന്നും അഖ്‌സയെ പ്രതിരോധിക്കാന്‍ ഫലസ്തീന്‍ ജനങ്ങള്‍ രംഗത്തുവരണം.
അനുഗ്രഹീതമായ അല്‍അഖ്‌സ പള്ളിയില്‍ ഞായറാഴ്ച സംഭവിച്ചത് എല്ലാ അറബികള്‍ക്കും മുസ്ലിംകള്‍ക്കും നേരെയുള്ള ഭീകരതയും ആക്രമണവുമാണ്. പുണ്യസ്ഥലങ്ങളായ അല്‍അഖ്‌സാ പള്ളിക്കെതിരെ സയണിസ്റ്റ് ശത്രു തങ്ങളുടെ ആക്രമണാത്മക ഉദ്ദേശ്യങ്ങള്‍ പ്രഖ്യാപിക്കുന്ന ഒരു സമയത്ത്, ഈ ശത്രുവുമായുള്ള ബന്ധം സാധാരണ നിലയിലാക്കാന്‍ ചില രാജ്യങ്ങളും ഭരണാധികാരികളും നിര്‍ബന്ധിക്കുകയാണെന്നും ഇസ്ലാമിക് ജിഹാദ് വക്താവ് താരിഖ് സല്‍മി കുറ്റപ്പെടുത്തി.
അല്‍അഖ്‌സാ പള്ളിയിലെ ഇസ്രായേല്‍ അധിനിവേശത്തിന്റെ ആക്രമണം ‘ലോകമെമ്പാടുമുള്ള എല്ലാ മുസ്‌ലിംകളുടെയും കോപം ആളിക്കത്തിക്കുന്നുവെന്നും സല്‍മി ആവര്‍ത്തിച്ചു.
ഇസ്രായേല്‍ അധിനിവേശം അവസാനിപ്പിക്കണമെന്നും ഫലസ്തീനികള്‍ക്കു നേരെയുള്ള പ്രകോപനം അവസാനിപ്പിക്കണമെന്നും കഴിഞ്ഞ ദിവസം ഫലസ്തീന്‍ വിമോചന സംഘടനയായ ഹമാസും ആഹ്വാനം ചെയ്തിരുന്നു.
