ഏഥൻസ്: കിഴക്കൻ മെഡിറ്ററേനിയനിലെ സങ്കീർണമായികൊണ്ടിരിക്കുന്ന പ്രശ്നം പരിഹരിക്കുന്നതിന് തെരഞ്ഞെടുക്കപ്പെട്ട പുതിയ അമേരിക്കൻ പ്രസിഡന്റ് ജോ ബൈഡന്റെ സുപ്രധാന ഇടപെടൽ പ്രതീക്ഷിക്കുന്നുവെന്ന് ഗ്രീസ് പ്രധാനമന്ത്രി കിറിയാക്കോസ് മിത്സോറ്റാകിസ്. നാറ്റോയുടെ നേതൃത്വമെന്ന നിലയിൽ യു.എസിന്റെ മുഖ്യപങ്കിനെ, മേഖലയിലെ എല്ലാ പങ്കാളികൾക്കൊപ്പം സ്വാഗതം ചെയ്യാൻ ഞങ്ങൾക്ക് എല്ലാ കാരണങ്ങളുണ്ട് -തലസ്ഥാനമായ ഏഥൻസിൽ ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സീസിയുമായി ബുധനാഴ്ച നടത്തിയ കൂടിക്കാഴ്ചക്ക് ശേഷം ഗ്രീസ് പ്രധാനമന്ത്രി കിറിയാക്കോസ് പറഞ്ഞു.
പ്രകൃതി വാതക നിക്ഷേപം കണ്ടെത്തുന്നതും, ഉപയോഗപ്പെടുത്തുന്നുതുമായ അവകാശത്തെ ചൊല്ലിയുള്ള കിഴക്കൻ മെഡിറ്ററേനിയനിലെ അതിർത്തി തർക്കത്തിൽ ഈജിപ്തും ഗ്രീസും തുർക്കിക്കെതിരെ നിലയുറപ്പിച്ചിരിക്കുകയാണ്. ഇത് മാസങ്ങളായി തുർക്കിയുടെയും ഗ്രീസിന്റെയും ഭാഗത്ത് നിന്നുള്ള സൈനിക തയാറെടുപ്പിന് കാരണമായിരിക്കുകയുമാണ്.