വാഷിങ്ടൺ: ഗ്രീസുമായി തർക്കം നിലനിൽക്കുന്ന ജല മേഖലയിലേക്ക് ഊർജ പര്യവേഷണത്തിനായി തുർക്കി അയച്ച കപ്പൽ തിരിച്ചുവിളിക്കണമെന്ന് യു.എസ് ചൊവ്വാഴ്ച ആവശ്യപ്പെട്ടു. തുർക്കിയുടെ നടപടിയെ മുൻകൂട്ടിയുള്ള പ്രകോപനമാണെന്നാണ് യു.എസ് വിശേഷിപ്പിച്ചത്. ഗ്രീക്ക് ദ്വീപായ കാസ്റ്റെല്ലോറിസോയുടെ തെക്ക് ഭൂചലന സർവേ നടത്താനുള്ള തുർക്കിയുടെ തിങ്കളാഴ്ചത്തെ നീക്കം ഗ്രീസ്, ഫ്രാൻസ്, ജർമനി തുടങ്ങിയ രാജ്യങ്ങളെ പ്രകോപിപ്പിച്ചിരിക്കുകയാണ്.
സമ്മർദ്ദം, ഭീഷണി, ഭയപ്പെടുത്തുക, സൈനിക നടപടി തുടങ്ങിയവ കിഴക്കൻ മെഡിറ്ററേനിയനിലെ പ്രശ്നം പരിഹരിക്കുകയില്ല. കണക്ക് കൂട്ടിയുള്ള പ്രകോപനപരമായ നടപടി അവസാനിപ്പിക്കാനും, ഗ്രീസുമായി അടിയന്തര ചർച്ചക്ക് തയാറാകാനും അങ്കാറയോട് ഞങ്ങൾ ആവശ്യപ്പെടുന്നു- സ്റ്റേറ്റ് ഡിപ്പാർട്ടമെന്റ് വക്താവ് മൊർഗൻ ഒർതഗസ് പറഞ്ഞു. തുർക്കിയുടെ തീരുമാനത്തെ വാഷിങ്ടൺ അപലപിക്കുന്നുവെന്നും അവർ കൂട്ടിചേർത്തു.