Youth

അശ്ലീലതയില്‍ നിന്നുള്ള മോചനം എങ്ങനെ?

വളരെ അപകടകാരിയും വ്യക്തിയെ സ്വയം നശിപ്പിക്കുകയും ചെയ്യുന്ന ഒന്നാണ് അശ്ലീല ചിത്രങ്ങള്‍ക്ക് അടിമപ്പെടുകയെന്നത്. ഇഛാശക്തിയോട് കൂടി ആവശ്യമായ തുടര്‍നടപടികള്‍ സ്വീകരിച്ചാല്‍ മാത്രമേ ഒരാള്‍ക്ക് അതില്‍ നിന്ന് രക്ഷപ്പെടാനാവുകയുള്ളൂ.
അവ ഉപേക്ഷിക്കുന്നതിന് കൃത്യമായ കൗണ്‍സിലിങ്ങും ചികിത്സയും ആവശ്യമായി വരും. മതനിഷ്ഠ പുലര്‍ത്തുന്ന മുസ്‌ലിംകളായ പ്രഗല്‍ഭരെ തന്നെ അതിന് തെരഞ്ഞെടുക്കുന്നതായിരിക്കും ഉത്തമം. പ്രസ്തുത രംഗത്ത് പ്രവര്‍ത്തിക്കുന്ന മുസ്‌ലിംകള്‍ ഇല്ലാത്ത സാഹചര്യത്തില്‍ ധാര്‍മികതയും മൂല്യങ്ങളും പരിഗണിക്കുന്ന മറ്റുള്ളവരെ സമീപിക്കാം. അപകടകരമായ ഈ സ്വഭാവം ഇല്ലാത്തയാളായിരിക്കണം അയാള്‍ എന്നത് വളരെ പ്രധാനമാണ്. അവരും അതിന് മുതിരുന്നവരാണെങ്കില്‍ അതിന്റെ അനന്തരഫലം എന്തായിരിക്കുമെന്ന് ചിന്തിക്കാവുന്നതേയുള്ളൂ. അവന്റെ ആത്മാവിന്റെ ചൈതന്യം നശിപ്പിക്കപ്പെടാനും ആത്മീയ നാശത്തിലേക്ക് നയിക്കപ്പെടാനുമാണ് അത് വഴിവെക്കുക.
തെറ്റുകളുടെ പ്രകൃതമാണ് അത് ചെയ്യുന്നവരെ അടിമപ്പെടുത്തുകയെന്നത്. ചെയ്യുന്ന തെറ്റുകളില്‍ ആനന്ദം കണ്ടെത്തുകയെന്നതാണ് മനുഷ്യമനസിന്റെ പ്രകൃതമെന്നത് വളരെ വ്യക്തമാണ്. അതിനെ സംബന്ധിച്ച് ഇമാം ബൂസിരി പറഞ്ഞത് വളരെ ശരിയാണ്, ‘മനസ് ഒരു കുട്ടിയെ പോലെയാണ്, നീയവനെ അവഗണിക്കുകയാണെങ്കില്‍ മുലകുടിച്ച് കൊണ്ട് അവന്‍ വലുതാകും. എന്നാല്‍ മുലകുടി നിര്‍ത്തിക്കുകയാണെങ്കില്‍ മുലകുടി നിര്‍ത്തുകയും ചെയ്യും.’ തെറ്റിനെ പിഴുതെറിയാന്‍ സഹായകമാകുന്ന ചില നിര്‍ദേശങ്ങളാണ് ചുവടെ ചേര്‍ക്കുന്നത്.

1. ഹീനമായ തെറ്റിനെകുറിച്ച് ആലോചിക്കുകയും അതിന്റെ വൃത്തികേടുകള്‍ മനസിലാക്കുകയും ചെയ്യുക. ഖുര്‍ആനും പ്രവാചകചര്യയും വരച്ചു കാണിച്ചിട്ടുള്ള നരകത്തിന്റെ ചിത്രം സാധ്യമാകുമ്പോഴെല്ലാം കണ്‍മുന്നില്‍ കൊണ്ടുവരിക. അശ്ലീല പുസ്തകങ്ങളും ചിത്രങ്ങളും കാണാനുള്ള പ്രലോഭനം ഇല്ലാതാക്കുന്നത് വരെയത് തുടര്‍ന്ന് കൊണ്ടിരിക്കുക. അപ്പോള്‍ നിങ്ങള്‍ക്ക് ഒരു സമയത്ത് അതിന്റെ അടിമയായപ്പോള്‍ ലഭിച്ചിരുന്ന ആനന്ദത്തിന്റെ സ്ഥാനത്ത് വേദനയും പ്രയാസവും അനുഭവപ്പെടും.
2. നിങ്ങളുടെ ജീവിതത്തെ ബാധിക്കുന്ന മാരകമായ അര്‍ബുദത്തെ പറ്റി നിങ്ങളെ തന്നെ ബോധ്യപ്പെടുത്തുക. അതിനായി അത്തരം സ്വഭാവങ്ങളുടെ കൂട്ടത്തില്‍ പെടുന്ന കാര്യങ്ങളെയും അതിലേക്ക് ആകര്‍ഷിക്കുന്ന കാര്യങ്ങളെയും തിട്ടപ്പെടുത്തേണ്ടതുണ്ട്. ശരീരത്തെ ബാധിക്കുന്ന അര്‍ബുദത്തേക്കാള്‍ മാരകമാണ് ആത്മാവിനെ ബാധിക്കുന്ന അര്‍ബുദമെന്ന് ഓര്‍ക്കുക. കാരണം ശരീരമെന്നത് ഒരാളുടെ മരണത്തോടെ ജീര്‍ണ്ണിക്കുന്ന ഒന്നാണ് എന്നാല്‍ ആത്മാവ് അതിന് ശേഷവും നിലനില്‍ക്കുന്നതാണ്.
3. വളരെ ഹീനമായ തെറ്റിന് അടിമപ്പെട്ടുള്ള അവസ്ഥയിലാണ് നീ മരണപ്പെടുന്നതെങ്കില്‍ അതെത്ര ഭയാനകമായ നഷ്ടമായിരിക്കുമെന്ന് സങ്കല്‍പ്പിച്ച് നോക്കുക.
4. അല്ലാഹുവിനോട് അവന്റെ സഹായത്തിനായി ശക്തിതേടികൊണ്ടിരിക്കുക, അതായിരിക്കണം നിങ്ങളുടെ ശക്തി. അല്ലാഹുവിന്റെ സഹായം കിട്ടുന്നതിന് അവനുമായി ശക്തമായ ബന്ധം സ്ഥാപിക്കേണ്ടത് അനിവാര്യമാണ്. ദൈനംദിന പ്രാര്‍ഥനകളിലൂടെയും നമസ്‌കാരങ്ങളിലൂടെയുമാണ് അല്ലാഹുമായുള്ള ബന്ധം ശക്തിപ്പെടുത്തേണ്ടത്. അത് കൊണ്ട് അവ ഒരിക്കലും ഉപേക്ഷിക്കാതിരിക്കുക.
5. അത്തരം മ്ലേഛമായ കാര്യങ്ങളെ കുറിച്ച് ചിന്തിക്കാന്‍ സമയം ഇല്ലാത്ത രൂപത്തില്‍ ഓരോ ദിവസത്തെയും സമയത്തെ ക്രമീകരിക്കുക. ഇമാം ശാഫിഈ ഒരിക്കല്‍ പറഞ്ഞു, ‘നിന്റെ മനസിനെ നന്മകള്‍ കൊണ്ട് നീ വ്യാപൃതമാക്കിയില്ലെങ്കില്‍, തിന്മകളില്‍ നിന്നെയത് വ്യാപൃതനാക്കും.’
6. നിങ്ങള്‍ക്ക് ചുറ്റും ഇസ്‌ലാമികവും ആത്മീയവുമായ ഒരന്തരീക്ഷം ഉണ്ടാക്കിയെടുക്കുകയും അതില്‍ മുഴുകുകയും ചെയ്യുക.
7. വിശ്വാസികളായ നല്ല ആളുകളുമായി ബന്ധം സ്ഥാപിക്കുകയും അവരോടൊപ്പം നല്ല പ്രവര്‍ത്തനങ്ങളില്‍ ഏര്‍പ്പെടുകയും ചെയ്യുക. ഇസ്‌ലാമിനെ കുറിച്ച് കൂടുതല്‍ പഠിക്കുന്നതിനുള്ള അവസരങ്ങള്‍ ഉപയോഗപ്പെടുത്തുകയും ചെയ്യുക.
8.  നിങ്ങളുടെ നാവും മനസും എപ്പോഴും അല്ലാഹുവിനെ സ്തുതിക്കുന്നതാക്കി മാറ്റുക. സുബ്ഹാനല്ലാഹ്, അല്‍ഹംദുലില്ലാഹ്, അസ്തഗ്ഫിറുല്ലാഹ് തുടങ്ങിയ ദിഖ്‌റുകള്‍ ആവര്‍ത്തിച്ചു കൊണ്ടേയിരിക്കുക.
9. അത്തരം തിന്മയില്‍ നിന്നും വേറിട്ട് നില്‍ക്കാന്‍ സാധിച്ചാല്‍ വിവാഹിതനാകുന്നതിനെ പറ്റി ഗൗരവത്തില്‍ ആലോചിക്കുക. അതിലേക്ക് ആകര്‍ഷിക്കുന്നതില്‍ നിന്ന് വിവാഹം ഒരു സംരക്ഷണമാണ്.
എല്ലാ പൈശാചിക വൃത്തികളില്‍ നിന്നും ചിന്തകളില്‍ നിന്നും അല്ലാഹു നമ്മെ കാത്തുരക്ഷിക്കട്ടെ, വിശ്വാസം കൊണ്ടവന്‍ ഹൃദയത്തെ നിറക്കുകയും തെറ്റുകളില്‍ നിന്നും സംരക്ഷിക്കുകയും ചെയ്ത് നല്ല വാക്കുകളുടെയും പ്രവൃത്തിയുടെയും ഉടമകളാക്കി നമ്മെ മാറ്റട്ടെ.

വിവ : അഹ്മദ് നസ്വീഫ് തിരുവമ്പാടി
 

Facebook Comments
Related Articles

ശൈഖ് അഹ്മദ് കുട്ടി

1946 ല്‍ മലപ്പുറം ജില്ലയിലെ എടയൂരില്‍ ജനനം. ഇസ്‌ലാമിക ഗവേഷകന്‍, പണ്ഡിതന്‍, പ്രഭാഷകന്‍, രചയിതാവ് എന്നീ നിലകളിലും ശ്രദ്ധേയന്‍. ഇസ്‌ലാമിക വിദ്യാഭ്യാസസാസംകാരിക മേഖലകളില്‍ നേതൃപരമായ പങ്കു വഹിക്കുന്നു. ഇസ്‌ലാമിക ഫൗണ്ടേഷന്‍, ടൊറണ്ടോ ഡയറക്ടര്‍, ഇസ്‌ലാമിക് ഇന്‍സ്റ്റിട്ട്യൂട്ട് ഓഫ് ടൊറണ്ടോ ചാന്‍സലര്‍, ടൊറണ്ടോ ഇസ്‌ലാമിക് ഫൗണ്ടേഷന്‍ മസ്ജിദ് ഇമാം. 1970 ല്‍ വിദ്യാര്‍ഥിയായി കാനഡയിലെത്തുകയും പിന്നീട് കാനഡയിലെ പൗരത്വം സ്വീകരിക്കുകയും ചെയ്തു. ഇംഗ്ലീഷ്, ഫ്രഞ്ച്, അറബി, ഉറുദു, മലയാളം ഭാഷകളില്‍ അവഗാഹമുണ്ട്. സഊദി അറേബ്യ, യു.എ.ഇ, ഈജിപ്ത്, കുവൈത്ത്, ഇംഗ്ലണ്ട്, സൗത്ത് അമേരിക്ക, യു.എസ്.എ എന്നീ രാജ്യങ്ങള്‍ സന്ദര്‍ശിച്ചിട്ടുണ്ട്.

സ്വദേശത്തെ പ്രാഥമിക വിദ്യാഭ്യസത്തിന് ശേഷം ശാന്തപുരം ഇസ്‌ലാമിയ കോളേജില്‍ പഠിച്ചു. 1966 ല്‍ എഫ്.ഡി, ബി.എ.എസ്.സി കോഴ്‌സുകള്‍ പാസ്സായ ശേഷം അല്പകാലം പ്രബോധനം വാരികയില്‍ ജോലി ചെയ്തു. 1968 ല്‍ മദീനാ യൂണിവേഴ്‌സിറ്റിയില്‍ ഉപരിപഠനത്തിന് ചേര്‍ന്നു. 1972 ല്‍ അവിടെ നിന്നും ബിരുദം നേടി. 1973 ല്‍ ടൊറണ്ടോ യൂണിവേഴ്‌സിറ്റിയില്‍ നിന്ന് എം.എ ബിരുധം നേടി. 1975 മുതല്‍ 1981 വരെ മാക്ഗില്‍ യൂണിവേഴ്‌സിറ്റിയില്‍ പി.എച്ച്.ഡി വിദ്യാര്‍ഥിയായിരുന്നു.

1973 മുതല്‍ വടക്കേ അമേരിക്കയിലെ കാനഡയാണ് പ്രവര്‍ത്തനരംഗം. ഇസ്‌ലാമിനെ പരിചയപ്പെടുത്തുവാന്‍ വിവിധമാധ്യമങ്ങള്‍ പ്രയോജനപ്പെടുത്തുന്നു. ഇതിനായി സെമിനാറുകളും സിമ്പോസിയങ്ങളും കോണ്‍ഫറന്‍സുകളും സംഘടിപ്പിക്കുന്നു. ഇസ്‌ലാമിക ഹൊറൈസന്‍സ്, ദ മെസ്സേജ്, അല്‍ ബശീര്‍, വാഷിങ്ടണ്‍ റിപ്പോറ്ട്ട് ഓണ്‍ മിഡില്‍ഈസ്റ്റ് അഫേഴ്‌സ് തുടങ്ങിയ പത്രങ്ങളില്‍ ലേഖനങ്ങളെഴുതുന്നു. കനേഡിയന്‍ ടി.വി, റേഡിയോ, പത്രങ്ങള്‍, വെബ്‌സൈറ്റുകള്‍ എന്നിവയിലൂടെ അഭിമുഖങ്ങളും സൃഷ്ടികളും നല്‍കി വരുന്നു. ടൊറണ്ടോ ഇസ്ലാമിക സെന്റര്‍ അസി.ഡയറക്ടര്‍(19731975), ഇസ്‌ലാമിക് സെന്റര്‍ ഡയറക്ടര്‍ (19791981) ഇസ്‌ലാമിക ഫൗണ്ടേഷന്‍ ഡയറക്ടര്‍(1991മുതല്‍). ദ ഇസ്‌ലാമിക് അസോസ്സിയേഷന്‍ ഓഫ് നോര്‍ത്ത് അമേരിക്ക, ഇന്റര്‍ നാഷണല്‍ ഇന്‍സ്റ്റിട്ട്യൂട്ട് ഓഫ് ഇസ്‌ലാമിക് തോട്ട് എന്നീ ഇസ്‌ലാമിക സംഘടനകളുമായി സഹകരിച്ചു പ്രവര്‍ത്തിക്കുന്നു.

ഇബ്‌നു തൈമിയ്യ തിയോളജി ഇന്‍ ദ ലൈറ്റ് ഓഫ് അല്‍ അഖീദ, അല്‍ വാസ്വിത്വിയ്യ( മാക്ഗില്‍ യൂണിവേഴ്‌സിറ്റി1978) ഇബ്‌നുല്‍ ഖല്‍ദൂന്‍ ആറ്റിട്ട്യൂട് ടുവാര്‍ഡ്‌സ് സൂഫിസം ഇന്‍ ദ ലൈറ്റ് ഓഫ് സിഫാഉസ്സഇല്‍ (1976) ഇബ്‌നു തൈമിയ്യ ആന്റ് സൂഫിസം (1976) എന്നിവയാണ് പ്രധാന ഗവേഷണ പ്രബന്ധങ്ങള്‍. റമദാന്‍ ബ്ലെസ്സിങ് ആന്റ് റൂള്‍സ് ഓഫ് ഫാസ്റ്റിങ്, ഇസ്‌ലാമിക് ഫ്യൂണറല്‍ റൈറ്റ്‌സ് ആന്റ് പ്രാക്ടീസസ്, ദ മീഡിയ അവര്‍ റെസ്‌പോണ്‍സിബിലിറ്റി, ദ ഫോര്‍ ഇമാംസ് ആന്റ് ദ സ്‌കൂള്‍സ് ഓഫ് ജൂറിസ്പ്രുഡന്‍സ്, ദ പവര്‍ ഓഫ് പ്രെയര്‍, ഫിഖ്ഹ് ഇഷ്യൂസ്, ഹ്യൂമന്‍ റൈറ്റ്‌സ് ആന്റ് ദ ഇസ്‌ലാമിക് ശരീഅ, ശാഹ് വലിയുല്ലാഹ് ആന്റ് ശരീഅ എന്നീ കൃതികളുടെയും കര്‍ത്താവാണ്. സയ്യിദ് ഖുതുബിന്റെ അല്‍ അദാലതു ഫില്‍ ഇസ്‌ലാം എന്ന പുസ്തകം ഇസ്‌ലാമിന്റെ സാമൂഹ്യ നീതി എന്നപേരില്‍ മലയാളത്തിലേക്ക് വിവര്‍ത്തനം ചെയ്തിട്ടുണ്ട്.

askthescholar.com എന്ന സ്വന്തം വെബ്‌സൈറ്റ് മുഖേനയും onislam.net പോലുള്ള ഇസ്‌ലാമിക സൈറ്റുകളിലും ഇസ്‌ലാമിക വിഷയങ്ങില്‍ ഫത്‌വ നല്‍കുന്ന വ്യക്തി കൂടിയാണിദ്ദേഹം.

Close
Close