കുട്ടികളുടെ സ്‌നേഹത്തിന്റെയും അനുകമ്പയുടെയും സുരക്ഷിതത്വത്തിന്റെയും വിവിധങ്ങളായ ആവശ്യങ്ങൾ നിറവേറ്റുന്നതിന്, പ്രിയപ്പെട്ട ഉമ്മമാർ ഇനിപ്പറയുന്ന കാര്യങ്ങൾ കൈക്കൊള്ളുന്നത് നന്നായിരിക്കും :
1- ചുംബനം: ഒരു ചുംബനം കുട്ടികളോടുള്ള ഹൃദയ കാരുണ്യത്തിന്റെ അടയാളമാണ്. പ്രായമായവരും ചെറുപ്പക്കാരും തമ്മിലുള്ള സ്നേഹബന്ധം ഊട്ടിയുറപ്പിക്കുന്ന ഒന്ന്കൂടിയാണത്. ഇത് പ്രവാചകന്റെ സുന്നത്ത് കൂടിയാണല്ലോ.
ആഇശ (റ) യിൽ നിന്ന് നിവേദനം ചെയ്ത ഒരു ഹദീസിൽ ഇങ്ങനെ കാണാം: ” അറേബ്യന്‍ മരുഭൂമിയിലെ ഒരു നാടോടി ഗോത്രം നബിയുടെ സദസ്സിൽ വന്ന് പറഞ്ഞു: “നിങ്ങൾ? നിങ്ങളുടെ മക്കളെ ചുംബിക്കാറുണ്ടോ?” സഹാബികൾ പറഞ്ഞു: “അതെ.” ആ നാടോടികളായ ആഗതർ പറഞ്ഞു, “എന്നാൽ ഞങ്ങൾ, മക്കളെ ഒരിക്കലും ചുംബിക്കാറില്ല.” അപ്പോൾ പ്രവാചകൻ അവരോടായി പറഞ്ഞു: “അങ്ങനയെങ്കിൽ ഞാൻ എന്തുചെയ്യും. അല്ലാഹു നിങ്ങളുടെ കാരുണ്യഭാവം നഷ്‌ടപ്പെടുത്തിയോ?” [അൽ-അൽബാനി: സഹീഹ് സുനൻ ഇബ്നു മാജ]
അബു ഹുറൈറ(റ) നിവേദനം ചെയ്യുന്ന ഒരു ഹദീസിൽ, അഖ്‌റഅ് ഇബ്നു ഹാബിസ് പ്രവാചകൻ തന്റെ പേരക്കുട്ടി ഹുസൈൻ (റ) വിനെ ചുംബിക്കുന്നത് കണ്ടു എന്ന് പറയുന്ന ഒരു ഹദീസിൽ അദ്ദേഹം പറയുന്നത് കാണുക: “എനിക്ക് പത്തു കുട്ടികളുണ്ട്, അവരെ ആരെയും ഞാൻ ഇതുവരെ ചുംബിച്ചിട്ടില്ല. അപ്പോൾ അല്ലാഹുവിന്റെ പ്രവാചകൻ അയാളോട് പറഞ്ഞു: “കരുണ കാണിക്കാത്തവന് കരുണ ലഭിക്കുകയുമില്ല.” [അൽ-അൽബാനി: സഹീഹ് സുനൻ അബി ദാവൂദ്]
2- കളിയും തമാശയും: പ്രവാചകന്റെ കുട്ടികളോടൊപ്പമുള്ള രീതി അങ്ങനെയാണ്. അവരോടൊപ്പം കളിക്കുകയും ചിരിക്കുകയും തമാശ പങ്ക് വെക്കുകയും ചെയ്യാറുണ്ടായിരുന്നു.
അനസ് (റ) വിൽ നിന്ന് നിവേദനം: അദ്ദേഹം പറഞ്ഞു: പ്രവാചകൻ ഞങ്ങളുമായി വളരെയധികം ഇടകലർന്നിരുന്നു. അദ്ദേഹം എന്റെ ഇളയ സഹോദരനോട് പറയുമായിരുന്നു: “ഓ അബു ഉമൈർ! നമ്മുടെ രാക്കിളിക്ക് എന്ത് സംഭവിച്ചു?” എന്റെ സഹോദരന് ഒരു ചെറിയ പക്ഷി കുഞ്ഞ് ഉണ്ടായിരുന്നു, അതുമായി അവൻ കളിക്കാറുമുണ്ടായിരുന്നു. പിന്നീട് ആ പക്ഷി കുഞ്ഞ് ചത്തു. [ബുഖാരിയും മുസ്ലിമും]
കളികൾ കുട്ടിയിൽ വലിയ സ്വാധീനം ചെലുത്തുമെന്നതിൽ സംശയമില്ലല്ലോ.
3- സമ്മാനങ്ങൾ നൽകുക: തീർച്ചയായും, സമ്മാനങ്ങൾ മനസ്സിൽ വലിയ സ്വാധീനമാണ് ഉണ്ടാക്കുക. പ്രവാചകൻ പഠിപ്പിച്ചു: “നിങ്ങൾ സമ്മാനങ്ങൾ കൈമാറുക, അത് നിങ്ങളിൽ പരസ്പര സ്നേഹം വലിയ തോതിൽ വർധിപ്പിക്കും.” [അൽ-അൽബാനി: സഹീഹ് അൽ-ജാമിഅ്’]
ആരാധനകളിലും നോമ്പ് പോലത്ത ഉപവാസ കർമങ്ങൾ ശ്രദ്ധയോടെ നിലനിർത്തുന്നതിനും പഠനത്തിൽ മികവ് പുലർത്തുന്നതിനും കുട്ടികളുടെ റൂം വൃത്തിയോടെ ക്രമപ്പെടുത്താനും ഇത്തരം സമ്മാനങ്ങൾ ഏറെ ഉപകാരപ്പെടും. അങ്ങനെ , വേഗത്തിലും പൂർണ്ണഹൃദയത്തോടെയും തന്റെ ചുമതലകൾ നിറവേറ്റാൻ ഇത്തരം സമ്മാനങ്ങൾ കുട്ടിയെ സജ്ജമാക്കും.
4- തലയ്ക്ക് മുകളിലൂടെ കൈ തടവൽ: അതാണ് പ്രവാചകന്റെ അധ്യാപനം. കുട്ടികളോട് സംസാരിക്കുമ്പോൾ അവരുടെ തലയിലും കവിളിലും കൈ സ്പർശം നടത്തുന്നത് അവരെ കൂടുതൽ അടുപ്പിക്കും. ഇത് ദയ, അനുകമ്പ, സ്നേഹം, അടുപ്പം എന്നിവയുടെ ഒരു പ്രകട രൂപമാണ്.
5- സന്തോഷത്തോടെ സ്വീകരിക്കുക, അവരുടെ കാര്യങ്ങൾ ചോദിച്ചറിയുക. പ്രവാചകൻ തന്റെ മകൾ ഫാത്തിമയോട് കാണിച്ച സ്നേഹം ഉദാഹരണം. ഫാത്തിമ നബിയുടെ അടുത്തേക്ക് വരുബോൾ പ്രവാചകൻ അവളെ ഹൃദ്യമായി സ്വീകരിക്കുകയും അവളെ ആലിംഗനം ചെയ്ത് ചുംബിച്ച് തന്റെ സ്ഥാനത്ത് ഇരുത്തുകയും ചെയ്യാറുണ്ടായിരുന്നു എന്നത് ചരിത്രമാണ്. പ്രവാചകന മരണക്കിടക്കയിലായിരിക്കെ മാത്രമാണ് ഇതിന്ന് ഭംഗമുണ്ടായതെന്നും ചരിത്രം പറയുന്നു. മക്കളുടെ കാര്യങ്ങൾ ഉമ്മമാർ നന്നായി അന്വേഷിക്കണം. സ്‌കൂളിൽ നിന്ന് മടങ്ങിയെത്തിയ ശേഷം അവർ ചെയ്ത കാര്യങ്ങളെക്കുറിച്ചും മറ്റും അന്വേഷിച്ചറിയുക. ഇതെല്ലാം അവരെ ഏറെ സ്‌നേഹിക്കുകയും പരിപാലിക്കുകയും ചെയ്യുന്നു എന്ന തോന്നൽ മക്കളിലുണ്ടാക്കാൻ രക്ഷിതാക്കളെ സഹായിക്കും.
6- ആണ് – പെണ്ണ് എന്ന വ്യത്യാസമില്ലാതെ കുട്ടികൾക്കിടയിൽ തുല്യ പരിഗണനയാണ് നൽകേണ്ടത്.
ആഇശ(റ) യിൽ നിന്ന് നിവേദനം ചെയ്ത ഒരു ഹദീസിൽ ഇങ്ങനെ കാണാം: “ഒരു സ്ത്രീ രണ്ട് പെൺമക്കളോടൊപ്പം സഹായം ആവശ്യപ്പെട്ട് എന്റെ അടുക്കൽ വന്നു, എന്നാൽ എന്റെ പക്കൽ അവൾക്ക് കൊടുക്കാനായി ഒരു കാരക്കയല്ലാതെ മറ്റൊന്നും ഉണ്ടായിരുന്നില്ല. ഞാൻ അവൾക്ക് അത് കൊടുത്തു, ആ ഉമ്മ അത് തന്റെ രണ്ട് പെൺമക്കൾക്ക് പകുത്തുകൊടുത്തു, ഉമ്മ ഒന്നും കഴിച്ചതുമില്ല. അങ്ങനെ അവർ മൂവരും പോവുകയും ചെയ്തു. കുറച്ചു കഴിഞ്ഞ് പ്രവാചകൻ വന്നു, ഞാൻ ഈ കഥ അദ്ദേഹത്തെ അറിയിച്ചു. അദ്ദേഹം പറഞ്ഞു: “ഈ പെൺമക്കളാൽ വിചാരണയ്ക്ക് വിധേയമാകുകയും അല്ലാഹു അവരോട് ഉദാരമായി (ദയയോടെ) പെരുമാറുകയും ചെയ്താൽ, ഈ പെൺമക്കൾ നരകാഗ്നിയിൽ നിന്ന് ആ മാതാവിന് ഒരു കവചമായി പ്രവർത്തിക്കും.” [ബുഖാരിയും മുസ്ലിമും]
ഉമ്മമാർ തന്റെ മക്കൾക്കിടയിൽ നീതിയോടെയാണ് വർത്തിക്കേണ്ടത്. ആൺകുട്ടികളെയും പെൺകുട്ടികളെയും ഒരേ പോലെ കരുണയുടെയും നീതിയുടെയും കരുതലിന്റെയും അനുകമ്പയുടെയും പരിഗണന കൊണ്ടാവണം ഓമനിക്കുകയും ലാളിക്കുകയും ചെയ്യേണ്ടത്. പ്രവാചകൻ പഠിപ്പിച്ചതുപോലെ: “അല്ലാഹുവിനെ ഭയപ്പെടുക, നിങ്ങളുടെ മക്കൾക്കിടയിൽ നീതി പാലിക്കുക.” [ബുഖാരിയും മുസ്ലിമും]
7- നന്മ മാത്രം ചെയ്യുക: ഒരു ഉമ്മയും തന്റെ മക്കളോട് തിന്മ ചെയ്യാൻ പാടില്ല എന്നത് പ്രവാചകന്റെ കൽപനയാണല്ലോ.
ജാബിർ (റ) വിൽ ഉദ്ധരിക്കപ്പെട്ട ഒരു നീണ്ട ഹദീസിൽ ഇങ്ങനെ കാണാം: “സ്വന്തത്തോടും മക്കളോടും സ്വത്തിനോടും നിങ്ങൾ തിന്മ ചെയ്യരുത്. നിങ്ങളുടെ തിന്മക്കായുള്ള തേട്ടം അല്ലാഹു നിങ്ങളുടെ പ്രാർത്ഥനയ്ക്ക് ഉത്തരം നൽകുന്ന സമയവുമായി ഒത്ത് വരാതിരിക്കാൻ നിങ്ങൾ ജാഗ്രത കാണിക്കണം.” [സഹീഹ് മുസ്ലിം]
ഇക്കാര്യങ്ങൾ പ്രയോഗിക ജീവിതത്തിലേക്ക് കൊണ്ട് വരുന്നതോടെ, കുട്ടികളുമായി നിങ്ങൾക്ക് മികച്ച ഒരു ബന്ധവും അതുവഴി മെച്ചമായ ഫലങ്ങളും ലഭിക്കും. സ്‌നേഹവും കാരുണ്യവും ആത്മബോധവും വിശ്വാസവും നിറഞ്ഞ അത്തരം വീടുകൾ സമതുലിതമായ ആത്മവിശ്വാസമുള്ള വ്യക്തികൾക്ക് രൂപം നൽകുമെന്നതിൽ സംശയമില്ല.
