ഇന്ത്യയിലെ മാധ്യമങ്ങള്‍ക്ക് ഇന്നത്തെപ്പോലെ അതിജീവനത്തിന് ഇത്രയും ഗുരുതരമായ അപകടം നേരിടേണ്ടി വന്നിട്ടില്ലെന്നാണ് പ്രമുഖരായ മുതിര്‍ന്ന മാധ്യമപ്രവര്‍ത്തകര്‍ കഴിഞ്ഞ ദിവസം പറഞ്ഞത്. പ്രസ് ക്ലബ് ഓഫ് ഇന്ത്യയുടെ 64ാം സ്ഥാപക ദിനത്തോടനുബന്ധിച്ച് നടന്ന ചടങ്ങില്‍ പങ്കെടുത്ത് സംസാരിക്കവേയായിരുന്നു അവർ.

സ്വതന്ത്ര മാധ്യമങ്ങളുടെ ശബ്ദം കെടുത്താനും ഇന്നത്തെ ഭരണകൂടത്തിന് വിധേയമാക്കാനുമുള്ള ശ്രമങ്ങള്‍ നടക്കുന്നുണ്ടെന്നും കൊളോണിയല്‍ കാലത്ത് പോലും ഇന്ത്യന്‍ മാധ്യമങ്ങള്‍ക്ക് ഇത്തരമൊരു സാഹചര്യം ഉണ്ടായിട്ടില്ലെന്നും അവര്‍ ചൂണ്ടികാട്ടുന്നു.

പ്രസ് ക്ലബ് ഓഫ് ഇന്ത്യ (പി.സി.ഐ) 1959ലാണ് സ്ഥാപിതമായത്. അന്നത്തെ ഹിന്ദുസ്ഥാന്‍ ടൈംസിന്റെ ചീഫ് എഡിറ്ററായിരുന്ന ദുര്‍ഗാ ദാസ് പ്രസിഡന്റും ഡി ആര്‍ മങ്കേക്കര്‍ സെക്രട്ടറിയുമായിരുന്നു. 1959 ഫെബ്രുവരി 2 ന് അന്നത്തെ ആഭ്യന്തര മന്ത്രി പണ്ഡിറ്റ് ഗോവിന്ദ് വല്ലഭ് പന്താണ് ക്ലബ്ബ് ഉദ്ഘാടനം ചെയ്തത്.

പ്രേം ശങ്കര്‍ ഝാ ഈ വിഷയം വിശദമായി ചര്‍ച്ച ചെയ്തു, മാധ്യമങ്ങളെ നിശബ്ദമാക്കാന്‍ നിലവിലെ സര്‍ക്കാര്‍ എല്ലാ ശ്രമങ്ങളും നടത്തുകയാണെന്നും പ്രസ്താവിച്ചു. മാധ്യമങ്ങളുടെ അഭിപ്രായ സ്വാതന്ത്ര്യത്തിനും രാജ്യത്തിന്റെ ഭാവിക്കും വേണ്ടിയുള്ള അവകാശം സംരക്ഷിക്കാനും സര്‍ക്കാരിനെതിരെ പോരാടാനും മാധ്യമ പ്രവര്‍ത്തകരോട് അദ്ദേഹം ആഹ്വാനം ചെയ്തു.

നിലവിലെ രാഷ്ട്രീയ വ്യവഹാരം മാധ്യമപ്രവര്‍ത്തകര്‍ക്ക് പ്രവേശനം അനുവദിക്കാത്ത ‘ലിബറേറ്റഡ് സോണുകള്‍’ രൂപീകരിക്കുകയാണെന്ന് വാര്‍ത്തകള്‍ ശേഖരിക്കുന്നതില്‍ നിന്ന് മാധ്യമപ്രവര്‍ത്തകരെ എങ്ങനെ തടയുന്നുവെന്ന് ചൂണ്ടിക്കാട്ടികൊണ്ട് പ്ലസ് ക്ലബ് പ്രസിഡന്റ് ഉമാകാന്ത് ലഖേര അഭിപ്രായപ്പെട്ടു.

പ്രസ് ക്ലബിന്റെയും മറ്റ് പ്രധാന പത്രപ്രവര്‍ത്തക സംഘടനകളുടെയും ശക്തമായ എതിര്‍പ്പ് ഉണ്ടായിരുന്നിട്ടും പാര്‍ലമെന്റ് സമ്മേളനങ്ങളിലേക്കുള്ള മാധ്യമപ്രവര്‍ത്തകരുടെ പ്രവേശനത്തിന് സര്‍ക്കാര്‍ ഏര്‍പ്പെടുത്തിയ നിയന്ത്രണം അദ്ദേഹം ഉദാഹരണമായി ചൂണ്ടിക്കാട്ടി. പല സര്‍ക്കാര്‍ ഓഫീസുകളിലും സ്ഥാപനങ്ങളിലും മാധ്യമപ്രവര്‍ത്തകര്‍ പ്രവേശിക്കുന്നത് വിലക്കിയിട്ടുണ്ട്. ഇന്ന് മാധ്യമ പ്രവര്‍ത്തകര്‍ നേരിടുന്ന ഏറ്റവും വലിയ വെല്ലുവിളി വാര്‍ത്തകളും വിവരങ്ങളും ശേഖരിക്കാന്‍ മാധ്യമപ്രവര്‍ത്തകര്‍ക്ക് പ്രവേശനം നിഷേധിക്കുന്നതാണ്.

അക്രഡിറ്റഡ് ഫോട്ടോ ജേണലിസ്റ്റുകളെ അവരുടെ പ്രൊഫഷണല്‍ ഉത്തരവാദിത്തങ്ങള്‍ നിര്‍വഹിക്കാന്‍ പല സ്ഥലങ്ങളിലും അനുവദിക്കുന്നില്ല. സംഭവസ്ഥലത്തേക്ക് പ്രവേശിക്കാന്‍ അനുവദിക്കുന്നില്ലെങ്കില്‍ ഒരു ഫോട്ടോഗ്രാഫര്‍ക്ക് തന്റെ സ്ഥാപനത്തിന് വേണ്ടി എങ്ങനെ ചിത്രങ്ങള്‍ പകര്‍ത്താനാകും?

നിലവില്‍, പ്രസ് ഇന്‍ഫര്‍മേഷന്‍ ബ്യൂറോയുടെ പട്ടികയില്‍ ഏകദേശം 7,000ഓളം മാധ്യമപ്രവര്‍ത്തകര്‍ ഉണ്ട്. മാധ്യമ സ്വാതന്ത്ര്യം സംരക്ഷിക്കാന്‍ ഞങ്ങള്‍ എല്ലാം ത്യജിക്കണം. ഇന്ത്യയില്‍ മാധ്യമസ്വാതന്ത്ര്യം എന്ന ആശയം സജീവമായി നിലനിര്‍ത്തുന്നതിന് എല്ലാ വര്‍ഷവും ഫെബ്രുവരി 2 ന് ക്ലബ്ബിന്റെ സ്ഥാപക ദിനം ആഘോഷിക്കുമെന്നും ലഖേര പ്രഖ്യാപിച്ചു.

ഇതേ വികാരങ്ങള്‍ പ്രതിധ്വനിച്ചുകൊണ്ട്, ഇന്നത്തെ പ്രശ്‌നങ്ങള്‍ അഭിമുഖീകരിക്കുന്നതില്‍ മാധ്യമ സാഹോദര്യ സഹകരണത്തിന്റെ പ്രാധാന്യത്തെക്കുറിച്ച് പി സി ഐ സെക്രട്ടറി ജനറല്‍ വിനയ് കുമാര്‍ ഊന്നിപ്പറഞ്ഞു. പി സി ഐ, പത്രപ്രവര്‍ത്തന സാഹോദര്യത്തിന്റെ അടയാളമാണ്, അത് ഞങ്ങളെ എല്ലാവരെയും ഒരുമിച്ചു നിര്‍ത്തുന്നു.

‘ജേണലിസം ഓഫ് കറേജ്’ എന്ന തത്വം സജീവമായി നിലനിര്‍ത്താനാണ് സംഘടനയുടെ സ്ഥാപകര്‍ ആഗ്രഹിക്കുന്നതെന്ന് പി സി ഐ വൈസ് പ്രസിഡന്റ് ഷാഹിദ് കെ അബ്ബാസ് വിശദീകരിച്ചു. പക്ഷേ, ‘സര്‍ക്കാരിനെയും ഭരണകക്ഷിയെയും വെല്ലുവിളിക്കേണ്ട വിഷയങ്ങളില്‍ മാധ്യമപ്രവര്‍ത്തകര്‍ ഇപ്പോള്‍ പ്രതിപക്ഷത്തെ അന്വേഷിക്കുന്നു’ എന്നത് ഖേദകരമാണ്.

സര്‍ക്കാരിന്റെ അഭൂതപൂര്‍വമായ കടന്നാക്രമണം കാരണം മാധ്യമസ്വാതന്ത്ര്യം സംരക്ഷിക്കുന്നത് ബുദ്ധിമുട്ടാണെന്ന് ദി ട്രിബ്യൂണിന്റെ മുന്‍ ബ്യൂറോ ചീഫും പി സി ഐയുടെ മുന്‍ പ്രസിഡന്റുമായ ടി ആര്‍ രാമചന്ദ്രന്‍ പറഞ്ഞു. മാധ്യമ സ്വാതന്ത്ര്യം സംരക്ഷിക്കാന്‍ ഞങ്ങള്‍ സഹകരിക്കണം, അതുവഴി അതിന്റെ ഉത്തരവാദിത്വങ്ങള്‍ സ്വതന്ത്രമായും ന്യായമായും നിര്‍വഹിക്കാന്‍ കഴിയും,’ അദ്ദേഹം അഭ്യര്‍ത്ഥിച്ചു.

ഇന്ത്യയിലെ മാധ്യമങ്ങള്‍ ഇപ്പോഴുള്ളതുപോലെ ഭീഷണി നേരിട്ടിട്ടില്ലെന്ന് പി സി ഐ സ്ഥാപക പ്രസിഡന്റ് ദുര്‍ഗാ ദാസിന്റെ ചെറുമകള്‍ സബീന ഇന്ദര്‍ജിത്ത് പറഞ്ഞു. മാധ്യമസ്വാതന്ത്ര്യം സംരക്ഷിക്കാന്‍ എല്ലാ മാധ്യമപ്രവര്‍ത്തകരും ഒന്നിക്കണമെന്നും അവര്‍ ആഹ്വാനം ചെയ്തു.

പി.സി.ഐയുടെ വിശുദ്ധി സംരക്ഷിക്കുക എന്നതാണ് ഇപ്പോഴത്തെ പ്രധാന ദൗത്യമെന്ന് പി സി ഐയുടെ മറ്റൊരു മുന്‍ പ്രസിഡന്റ് ഗൗതം ലാഹിരി പറഞ്ഞു. ഇത് ആക്രമണത്തിനിരയായിരിക്കുന്നു, മാധ്യമങ്ങള്‍ക്ക് എപ്പോള്‍ ഭീഷണിയുണ്ടായാലും അതിനെ പ്രതിരോധിക്കാന്‍ പിസിഐ എപ്പോഴും മുന്നോട്ട് വന്നിട്ടുണ്ടെന്നും അവര്‍ പറഞ്ഞു. മാധ്യമപ്രവര്‍ത്തകര്‍ തങ്ങളുടെ വ്യക്തിപരമായ അഭിപ്രായവ്യത്യാസങ്ങള്‍ മാറ്റിവെച്ച് സര്‍ക്കാരിന്റെ ആക്രമണത്തില്‍ നിന്ന് പി സി ഐയെ സംരക്ഷിക്കാന്‍ ഒരുമിച്ച് പ്രവര്‍ത്തിക്കണമെന്നും അദ്ദേഹം അഭ്യര്‍ത്ഥിച്ചു.

പി സി ഐക്കെതിരെയുള്ള ആക്രമണങ്ങള്‍ രാജ്യത്ത് മാധ്യമസ്വാതന്ത്ര്യത്തെ ഹനിക്കാന്‍ ശ്രമിക്കുകയാണെന്ന് മുതിര്‍ന്ന മാധ്യമപ്രവര്‍ത്തകന്‍ എസ്.എന്‍ സിന്‍ഹ പറഞ്ഞു. അത് മാധ്യമപ്രവര്‍ത്തകരുടെ മക്കയാണെന്നും അദ്ദേഹം ചൂണ്ടിക്കാട്ടി. ശ്രീനഗറിലെ കശ്മീര്‍ പ്രസ് ക്ലബ് അടച്ചുപൂട്ടിയതിനെ പരാമര്‍ശിച്ച്, രണ്ട് കൂട്ടം മാധ്യമപ്രവര്‍ത്തകര്‍ തമ്മിലുള്ള അഭിപ്രായവ്യത്യാസത്തിന്റെ പേരിലാണ് അത് പൂട്ടിയതെന്നും സിന്‍ഹ മുന്നറിയിപ്പ് നല്‍കി. പി സി ഐയിലും സമാനമായ അഭിപ്രായവ്യത്യാസങ്ങള്‍ ഉള്ളവരുണ്ടെന്നും ഇത് അടച്ചുപൂട്ടാന്‍ ശ്രമിക്കുകയും ചെയ്യുന്ന ആളുകള്‍ ഡല്‍ഹിയിലും ഉണ്ടെന്നും അദ്ദേഹം ചൂണ്ടിക്കാട്ടി.

എഡിറ്റോറിയല്‍ ശക്തി കുറയ്ക്കുന്നതിനും നിലവിലുള്ള ജീവനക്കാര്‍ക്ക് 40% ശമ്പളം വെട്ടിക്കുറയ്ക്കുന്നതിനുമായി വിവിധ മാധ്യമ സ്ഥാപനങ്ങള്‍ പിരിച്ചുവിടല്‍ നയം പിന്തുടരുന്നുണ്ടെന്ന് മുതിര്‍ന്ന ഹിന്ദി പത്രപ്രവര്‍ത്തകനായ ഹബീബ് അക്തര്‍ ചൂണ്ടിക്കാട്ടി. ഇത് മാധ്യമപ്രവര്‍ത്തകര്‍ക്കിടയില്‍ തൊഴിലില്ലായ്മയ്ക്കും വരുമാനക്കുറവിനും കാരണമായി. ‘എന്നിരുന്നാലും, ഈ സാഹചര്യം പരിഹരിക്കാന്‍ ഞങ്ങള്‍ക്ക് കഴിയുന്നില്ലെന്നും അദ്ദേഹം പറഞ്ഞു.

അവലംബം: muslimmirror.com