ബയ്റൂത്ത്: ആഗസ്റ്റിൽ തലസ്ഥാനമായ ബയ്റൂത്തിൽ 200ലധികം പേർ മരിക്കുന്നതിന് കാരണമായ സ്ഫോടന അന്വേഷണത്തിന് മേൽനോട്ടം വഹിക്കുന്ന ലബനീസ് ഇൻവെസ്റ്റിഗേറ്റർ ഉന്നതതല രാഷ്ട്രീയ-സുരക്ഷാ ഉദ്യോഗസ്ഥരുടെ പങ്ക് വ്യക്തമാക്കാതെ അന്വേഷണം അവസാനിപ്പിക്കുകയാണെന്ന് അൽജസീറ റിപ്പോർട്ട് ചെയ്തു. കുറ്റപത്രം തയാറാക്കുന്ന നടപടികളിലേക്ക് നീങ്ങുന്നതിന് മുമ്പ് ഫ്രഞ്ച് ഇൻവെസ്റ്റിഗേറ്ററുടെ റിപ്പോർട്ടിനായി ജഡീഷ്യൽ ഇൻവെസ്റ്റിഗേറ്റർ ഫാദി സവാൻ കാത്തിരിക്കുകയാണ്. രണ്ടാഴ്ചക്കുള്ളിൽ ലഭിക്കുമെന്നാണ് പ്രതീക്ഷിക്കുന്നതെന്ന് മുതിർന്ന ജു‍ഡീഷ്യൽ വൃത്തങ്ങൾ അറിയിച്ചതായി അൽജസീറ റിപ്പോർട്ട് ചെയ്തു.
കാര്യനിർവാഹകരും, സുരക്ഷാ ഉദ്യോഗസ്ഥരുമുൾപ്പടെ സ്ഫോടനവുമായി ബന്ധപ്പെട്ട് അറസ്സുചെയ്ത 25 പേരിൽ നിന്നാണ് കുറ്റപത്രം തയാറാക്കുക. നിലിവിലെ കസ്സംസ് മേധാവി ബദ്‌രി ദാഹർ, മുൻ കസ്സംസ് മേധാവി ഷഫീഖ് മർഈ, മുൻ തുറമുഖ ഡയറക്ടർ ഹസൻ ഖുറൈതം, തുറമുഖ മേൽനോട്ടം വഹിക്കുന്ന പൊതുമരാമത്ത് മന്ത്രാലയത്തിലെ കര-നാവിക ഗതാഗത ഡയറക്ടർ അബ്ദുൽ ഹഫീദ് ഖൈസി, സൈനിക രഹസ്യാന്വേഷണ വിഭാഗം മേധാവി ആൻ്റണി സല്ലൂം തുടങ്ങിയവർ അറസ്സിലായവരിൽ ഉൾപ്പെടുന്നു.
